Арктическай институкка креативнай индустрияҕа сыһыаннаах бырагыраамалар толкуйданаллар

Култуура уонна искусство Арктикатааҕы институтугар үөрэх саҥа бырагыраамалара толкуйданаллар. Креативнай экэниэмикэ салааларыгар идэтийбит исписэлиистэр элбээн, өрөспүүбүлүкэ сайдарыгар көмө буолуохтара.

«Өрөспүүбүлүкэҕэ биир инновационнай экосистиэмэ баар, манна «Якутия» технопаарка, ИТ-паарка, «Якутия» венчурнай хампаанньа, үрдүк үөрэх кыһалара, сайдыы институттара киирэллэр. Ааспыт сылга арыллыбыт креативнай кластер манна эмиэ төһүү күүс буолар. Маныаха каадырдары Арктикатааҕы институт бэлэмниир киининэн буолуоҕа», — диэн Ил Дархан Айсен Николаев Анал этиитигэр иһитиннэрбитэ.

Айсен Николаев бэлиэтээн эппитинэн, өрөспүүбүлүкэ салгыы даҕаны АГИКИ сайдарыгар  өйөбүл буолуоҕа.

Манна билигин 14 хайысханан 650-тан тахса устудьуон үөрэнэр.

Институт ректора Саргылаана Игнатьева этэринэн, билигин үөрэх кыһата «Приоритет-2030» диэн федеральнай бырагыраама чэрчитинэн уларыта тутууну ааһар. Институт өрөспүүбүлүкэ ырыынагын батыһа  саҥа хайысхалары, бырагыраамалары киллэрэргэ кыһаллар. Ол курдук, креативнай индустрия сайдарын  туһугар ювелирнай дизайнҥа, киинэ эйгэтигэр, анимацияҕа исписэлиистэри бэлэмнииргэ үөрэх бырагыраамаларын ылынарга былааннар бааллар.