Арктическай улуустар оҕолорун хомуска оонньуурга үөрэтиэхтэрэ

Быйыл Хомус киинэ уонна түмэлэ Абый, Аллайыаха, Муома, Үөһээ Халыма, Аллараа Халыма уонна Орто Халыма улуустарынан сылдьан, хомуска оонньуурга үөрэтиэхтэрэ.

Бу бырайыак 2023 сыллаахтан саҕаламмыта. Онно Хомус киинэ уонна түмэлэ “Хомус” уопсастыбаннай тэрилтэни кытта Ил Дархан гранын кыайыылааҕынан буолбуттара. Бу “Хомус кода” бырайыак чэрчитинэн 2023-2024 сс. 10 улууска сылдьыбыттара, 2095 оҕону үөрэппиттэрэ. АБДь кыттыылаахтарын оҕолоругар – 200 оҕоҕо хомуһу бэлэхтээбиттэрэ.

Былырыын бырайыак “Хомус эйгэтэ” айар мастарыскыай быһыытынан үлэлээбитэ. 9 улууска 1823 оҕону үөрэппиттэрэ, кинилэртэн АБДь кыттыылаахтарын оҕолоругар – 180 оҕоҕо хомуһу бэлэхтээбиттэрэ.