«Арктика кэскилэ» кэмпириэнсийэҕэ хоту улуустар оҕолоро төрөөбүт төрүт тылларынан кытталлар

Бүгүн Норуоттар икки ардыларынааҕы Арктическай оскуолаҕа «Арктика кэскилэ» өрөспүүбүлүкэтээҕи I кэмпириэнсийэ үлэтин саҕалаата.

Тэрээһиҥҥэ өрөспүүбүлүкэ хотугу уонна Арктическай улуустарыттан 60-тан тахса оҕо кэлэн кытта сылдьар. Ол курдук, 7-11 кылаас үөрэнээччилэрэ аҕыйах ахсааннаах төрүт норуоттар тылларынан алта хайысхаҕа хайдыһан, бэйэлэрин ыытар үлэлэрин уопутун эбээн, эбэҥки, юкагир, чукча, долган тылынан кэпсииллэр, билиһиннэрэллэр. Обургу оҕолор киһи истэ олоруох баай уопуттарын сырдаталлар. Холобура, Анаабыр улууһун Үрүҥ Хайа орто оскуолатын 9 кылааһын үөрэнээччитэ Егор Туприн долган омук төрүт үгэстэрин билиһиннэрдэ. Оттон Аллайыаха улууһун Оленегорскай орто оскуолатын 7 кылааһын үөрэнээччитэ Сандал Никулин хабдьыны бултуур ньыматын кэпсээтэ. Сандал куруппааскыны өссө 4-с кылаастан бултаан барбыт. Онон «бу көтөрү бултуур ньыманы толору баһылаатым» диэн санаатын үллэһиннэ. Ол курдук, атыыры уонна тыһыны эндэппэккэ билэр буолбут. Ордук сарсыарда эрдэ уонна киэһэ бултуур ордугун, пластик бытыылканы туттар ньыматын видеонан, хаартысканан көрдөрө-көрдөрө кэпсээбитэ, кэмпириэнсийэ кыттыылаахтарын болҕомтолорун тарта.

Кэмпириэнсийэни аһарыгар СӨ Арктика сайдыытын уонна Хотугу норуоттар дьыалаларын миниистирин бастакы солбуйааччыта Сергей Неустроев «бу күннэргэ аҕыйах ахсааннаах төрүт норуоттар Ассоциацияларын VIII сийиэстэрэ, ахсынньы 13-14 күннэригэр аҕыйах ахсааннаах олохтоох омук төрүт тылга учууталларын 1-кы сийиэһэ буолуоҕа. Онон, күндү оҕолор, эһиги бүгүн бу улахан суолталаах тэрээһиннэри арыйааччыларынан буолаҕыт. Эһиэхэ ситиһиилээх үлэни баҕарабын» диэн бэлиэтээтэ.

Кэмпириэнсийэ үлэтин түмүгүнэн бүгүн киэһэ кыайыылаахтар биллиэхтэрэ.