Арктика оройуоннарынан субсидиялаах билиэти атыылааһыны «Полярные авиалинии» АХ тохтотто

Бу туһунан «Полярные авиалинии» АХ генеральнай дириэктэрэ Семен Винокуров Ил Түмэҥҥэ тырааныспарынан хааччыйыы уонна пассажирдары таһыыга судаарыстыбаннай өйөбүллэр туһунан тиэмэҕэ төгүрүк остуол кэмигэр кэпсээтэ.

Сүбэ мунньаҕы кулун тутар 26 күнүгэр Ил Түмэҥҥэ Арктика дьыалаларыгар уонна аҕыйах ахсааннаах норуоттар боппуруостарыгар сис кэмитиэтин бэрэссэдээтэлэ Елена Голомарева салайан ыытта.

Чуолаан мунньах кыттыылаахтара Арктика олохтоохторун олоҕун хаачыстыбатын тупсарыыга сүҥкэн суолталаах авиабилиэт сыаната үрдүгүн, тырааныспар суола уустугун кэпсэттилэр.

«Полярные авиалинии» АХ генеральнай дириэктэрэ Семен Винокуров сүрүн кыһалҕанан көтөр аал флотун саҥардыыга уонна ахсаанын эбиигэ болҕомтотун уурда. Ол курдук, Аи-24 уонна Ан-24/Ан-26 көтөр ааллар двигателлэрин өрөмүөннүүр биир соҕотох «ОДК-сервис» собуотугар саппаас чаас тиийбэтэ этилиннэ. Маны таһынан, дойду ырыынагар Ан-24 муотуордарын сыаната 10-тан 55 мөл.солк. диэри улаатан, ону кытта 240 көрүҥнээх саппаас чаастары аҕалыыга уустуктар баалларынан бу боппуруоһу быһаарыыга ыарахаттары үөскэппит. Холобур, ОДК оҥорон таһаарар двигателлэрин сыанатын 60-тан 110 мөл.солк. диэри үрдээбит, ТВ3-117 двигателлэрин хапытаалынай өрөмүөнүн сыаната 31-тэн 50 мөл. солк. диэри эбиллибит, саппаас чаастара, агрегаттара уонна кэмпилиэктэрин сыаната 3 төгүл эбиллибит.

Хампанньа өрөспүүбүлүкэ 80%-нын хабар, 197 маршрутунан араас рейстэр оҥоһуллаллар, ол иһигэр 21 — оройуоннар икки ардыларыгар уонна 176 — улуус иһинэн. Бу сыалга бүддьүөттэн субсидияҕа 5 млрд.солк. ирдэнэр, ол гынан баран мантан 20% субсидияланар эбит.

«Билиҥҥи туругунан Тырааныспар министиэристибэтин соругунан хампаанньа алтынньы ыйга диэри 11 642 субсидияламмыт билиэти 224 мөл.солк. атыылаабыта. Онон бу даатаҕа өрөспүүбүлүкэ бүддьүөтүттэн авиахампаанньаҕа, өссө ааспыт сыллааҕы иэһи кытта холбоон, 257 мөл.солк. улахан суумалаах иэс үөскээтэ. Үбүлээһин хааччыллыбатаҕынан, иэс харчы сууматын таһыма үрдээбитин учуоттаан, Арктика оройуоннарыгар субсидияламмыт билиэттэри атыылааһын быйылгы сыл бүтүөр диэри тохтоторго быһаарыы ылылынна», — диэн Семен Винокуров быһаарда.

Бу боппуруоһу быһаарыыга генеральнай дириэктэр Ил Түмэҥҥэ кэккэ этиилэри киллэрдэ:

• — 2025 сылга Аи-24 салгын суудуналарыгар икки двигатели 100 мөл. солк. суумаҕа уонна үс ТВ3-117 двигатели 330 мөл. солк. атыылаһарга субсидияны биэрэр кыаҕы көрөргө;
• — «Тюменские моторостроители» ПАУо баазатыгар гражданскай авиацияҕа РУ19А-300 двигателлэри хапытаалынай өрөмүөнүгэр сертификациялааһын уонна саҥардыы боппуруостарын түргэтэтиигэ көмө оҥорорго;
• — Арассыыйаҕа оҥоһуллубут саҥа тииптээх суудуналар түһэллэригэр федеральнай бүддьүөттэн Саха сиригэр түһэр былаһааккалары саҥардыыга субсидиялааһыҥҥа этиилэри киллэрэргэ;
• — дойду үрдүнэн эргэрбит Ан-24, Ми-8Т, Ан-2, Ан-3Т салгын суудуналарын оннугар Арассыыйаҕа оҥоһуллар саҥа тииптэрин оҥорууну түргэтэтэргэ.

Ити уонна да атын боппуруостары дьүүллэһии түмүгүнэн пассажирдары таһыыга субсидияны биэрии боппуруоһа уонна норуот дьокутааттара көтөхпүт кыһалҕаларын быһаарыыга судаарыстыбаттан көрүллэр өйөбүл суолтатын учуоттаан, салгыы бырабыыталыстыба чааһын ыытарга быһаарыы ылылынна. Бу туһунан Ил Түмэн пресс-сулууспата суруйар. Сиһилии манна ааҕыҥ.