Арктика пуорумун бастакы тэрээһин мунньаҕа буолла

Москваҕа 2025 сыл кулун тутар 26-27 күннэригэр Мурманскайга ыытыллыахтаах «Арктика – кэпсэтии территорията» (МАФ) Норуоттар икки ардыларынааҕы VI Арктическай пуоруму ыытыыга аналлаах Тэрийэр кэмитиэт бастакы тэрээһин мунньаҕа буолла.

Мунньаҕы РФ бырабыыталыстыбатын бэрэссэдээтэлин солбуйааччы – РФ Бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ, РФ Норуоттар икки ардыларынааҕы пуоруму тэрийэр кэмитиэтин бэрэссэдээтэлэ Юрий Трутнев салайан ыытта.

— “Арктика – кэпсэтии территорията” пуорум Мурманскайга кулун тутар 26–27 күннэригэр ыытыллыаҕа. Мурманскай уобалас губернатора Андрей Чибис тэрээһини “Хотугу сиргэ олоруохха!” диэн девиһинэн ыытыахха диэн этиитин өйүүбүн. РФ бырабыыталыстыбата Арктика социальнай-экэнэмиичэскэй сайдыытыгар туһуламмыт киһи чахчы олоруон, сайдыан баҕарар усулуобуйатын тэрийиигэ дьоһуннаах үлэни ыытар. Арктикаҕа саамай улахан инвестиционнай бырайыактар ​​олоххо киирэллэр, Хотугу муора суолун сайыннарыыга үлэ барар. Арассыыйа бэрэсидьиэнин быһаарыытынан Арктика тирэх пууннарын саҥардыыга генеральнай былаан оҥоһуллар. Бу үлэ өрүү болҕомтону уонна өйөбүлү эрэйэр, ону биһиги бары бииргэ олоххо киллэрэр кыахтаахпыт”, — диэн бэлиэтээтэ Юрий Трутнев мунньаҕы аһарыгар.

— Быйылгы пуорумҥа эрэгийиэн бигэ туруктаах сайдыытыгар туһаайыллыбыт киэҥ кэпсэтии тахсыаҕа. Аан дойду таһымыгар бииргэ үлэлээһин туһунан кэпсэтии салҕаныаҕа. Москваҕа Арктика пуорумун көрсө 2025 сыл кулун тутар 13-14 күннэригэр «Уһук Илин уонна Арктика: туруктаах сайдыы» диэн норуоттар икки ардыларынааҕы 10-с научнай-практическай кэмпиринсийэ ыытыллыаҕа, – диэн РФ Бэрэсидьиэнин сүбэһитэ, бэрэссэдээтэл солбуйааччыта, МАФ тэрийэр кэмитиэтин эппиэттиир сэкирэтээрэ Антон Кобяков бэлиэтээтэ.

Пуоруму ыытыыга Мурманскай уобалас мээнэҕэ талыллыбатаҕа – Арассыыйа биир бөдөҥ эрэгийиэнэ аан дойдуга  саамай улахан экэнэмиичэскэй зонанан биллэр. Арассыыйа Хотугу флотун баазата уонна аан дойдуга соҕотох атомнай ледокол флота манна баар. Мунньах кыттыылаахтара бэлиэтииллэринэн, ыытыллаары турар пуорум бүтүн макрорегион сайдыытын быһаарар суолталаах тэрээһининэн буолуоҕа.

Тэрээһиҥҥэ бэлэмнэнии үлэтин былаанын сиһилии бу сигэнэн https://www.sakha.gov.ru/news/front/view/id/3482498 киирэн билсиҥ.