“Арктика учуутала” бырайыак Саха сирин оскуолаларын каадырынан бөҕөргөтөр

Ил Дархан көҕүлээһининэн Арктика улуустарын үөрэҕин тэрилтэлэригэр эдэр исписэлиистэри сыһыарыыга туһаайыллар “Арктика учуутала” бырайыак ситиһиилээхтик үлэлиир.

Бырайыак саҕаланыаҕыттан 2020-2024 сс. айаннарын ороскуотун уонна үс акылаат кээмэйдээх төлөбүр быһыытынан аадырыстаах көмөнү 214 эдэр педагог ылбыта. Быйыл бырагыраамаҕа өссө 26 эдэр исписэлиис кытынна. Ордук элбэх педагог Анаабыр уонна Булуҥ улуустарын оскуолаларыгар бардылар.

Бырайыак биир кыттааччытынан М.К.Аммосов аатынан Хотугулуу-Илиҥҥи федеральнай университет устуоруйаҕа бакылтыатын бүтэрбит Кирилл Жирков буолар. Кини Анаабыр улууһун гимназиятыгар устуоруйа, обществознание учууталынан үлэлии барда.

“Университеты быйыл бүтэрдим. Толкуйдаан көрөн баран бырайыакка кыттарга сананным, – диэн Кирилл Дмитриевич санаатын үллэстэр. – Хантараах баттастым, өйөбүл харчыны (подъемные средста) номнуо ыллым. Итини таһынан, мин бырайыакка идэ таһымын үрдэтинии кыаҕын сэҥээрдим. Бэйэм Анаабыр улууһуттан төрүттээхпин, онон Арктика улуустарыгар учуутал тиийбэт кыһалҕатын бэркэ билэбин.  Оскуолабыт улахана суох, эдэр педагог быһыытынан, үлэбин улахана суох кэлэктииптэн саҕалыырым үчүгэй. Биир идэлээхтэрим үчүгэйдик көрүстүлэр, уһуйааччыны сыһыардылар. Бастакы уруоктар этэҥҥэ аастылар, улахан долгуйуу суох – педагогическай быраактыкам кэмигэр ылбыт уопутум көмөлөстө.

Сааскылаах бөһүөлэгэр кэргэммин кытта кэлбиппит, толору хааччыллыылаах дьиэни көрдүлэр. Усулуобуйаны барытын тэрийдилэр, төрөөбүт Анаабырым улууһа сайдарын туһугар үлэлииргэ бэлэммин”.

ХИФУ физика-тиэхиньиичэскэй университетын бүтэрбит Дмитрий Сергеев Булуҥ улууһун Бороҕон оскуолатыгар физика, информатика учууталынан үлэтин саҕалаата.

“Дьонум Булуҥ улууһуттан төрүттээхтэр, оҕо сылдьан Тиксигэ аймахтарбар сотору-сотору кэлэрим”, – диэн Дмитрий Альбертович кэпсиир.

— Бороҕон сэлиэнньэтигэр физика, информатика, математика учуутала наадатын билэрим. Уопсастыбаҕа ирдэнэр буолуохпун, дойдубар көмөлөһүөхпүн баҕарабын. Судаарыстыба көмө көрөрө үөрүүлээх. Сыыйа үлэ үөһүгэр киирэн эрэбин. Тыа сирин олоҕо интэриэһинэй эбит, аан бастакытын муус бэлэмнээһинигэр сырыттым, олохтоохтору кытта булка, балыкка сылдьабын. Оҕолору билим-быраактыка кэмпириэнсийэтигэр кытыннарар былааннаахпын.

“Арктика учуутала” бырайыак ыраах оскуолалары каадырынан хааччыйар боппуруоһу быһаарарын таһынан, Арктика улууһугар үлэлии тиийэр эдэр исписэлиистэр идэтийэллэригэр, социальнай үөрүйэҕи ааһалларыгар усулуобуйа тэрийэн салгыы үлэлиир. Бу туһунан Үөрэх уонна билим министиэристибэтэ суруйар.