Арктика улуустарыгар «узкай» исписэлиистэр аан бастаан тиийиэхтэрэ

Мобильнай биригээдэлэр өрөспүүбүлүкэтээҕи кииннэрин исписэлиистэрэ атырдьах ыйыгар Арктика 7 улууһун ыраах сытар нэһилиэнньэлээх пууннарыгар тиийиэхтэрэ.

Маннык биригээдэлэргэ чуолаан педиатр уонна терапевт быраастар киирэр буоллахтарына, бу сырыыга Арктика улуустарыгар барар биригээдэ састаабыгар “узкай” идэлээх исписэлиистэр киириэхтэрэ. Ол эбэтэр олохтоохтор тиис бырааһыгар, хирурга, травматолог-ортопедка, харах бырааһыгар, кардиологка, акушер-гинекологка, неврологка, ультразвуковой диагностикаҕа, онториноларингологка уо.д.а. быраастарга көрдөрүнэр кыахтаныахтара.

Эмчиттэр ыарыһаҕы көрөн-истэн баран, наада буоллаҕына, УЗИ, ЭКГ уонна  холтер мониторина курдук инструментальнай-диагностика чинчийиилэрин ыытыахтара.

Бу Ил Дархан Айсен Николаев көҕүлээһининэн тэриллэр  киэҥ хабааннаах бырайыак Уһук Хотугу сир судургута суох, тыйыс усулуобуйатыгар аан  бастаан олоххо киллэриллэр.