Армения, Азербайджан уонна АХШ эйэлэһии декларацияҕа илии баттаатылар

Атырдьах ыйын 8 күнүгэр Армения, Азербайджан уонна АХШ лидердэрэ Вашингтоҥҥа бииргэ ылыллыбыт эйэлэһии декларацияҕа илии баттаатылар. 35 сыллаах утарылаһыы кэнниттэн Армения премьер-миниистирэ Пашинян уонна Азербайджан Бэрэсидьиэнэ Алиев АХШ Бэрэсидьиэнэ Дональд Трамп көмөтүнэн мөккүөрү эйэлээхтик быһаарыы туһунан бииргэ ылыллыбыт декларацияҕа илии баттаатылар. Бу туһунан Газета.ру суруйар.

Арассыыйа Армения уонна Азербайджан лидердэрин  ситиһиллибит сөбүлэһиилэрин үрдүктүк сыаналыыр диэн РФ Тас сибээскэ министиэристибэтин официальнай иһитиннэриитигэр этиллэр. Онно бэлиэтэнэринэн, Москва Ереван уонна Баку сыһыаннаһыыларын тупсарыыны Соҕуруу Кавказка бигэ туругу хааччыйар сүрүн усулуобуйалартан биирдэстэринэн ааҕар.

Туох туһунан сөбүлэстилэр (кылгастык):

Армения уонна Азербайджан бииргэ ылыллыбыт декларацияҕа илии баттаатылар. Кинилэр дипломатическай сыһыаны чөлүгэр түһэрэргэ уонна сэриилэһэн утары турууну болдьоҕо суох тохтоторго сөбүлэстилэр.

Өрүттэр Минскэй бөлөҕү ыһар туһунан ОБСЕ-га туһаайыллыбыт бииргэ ылыллыбыт ыҥырыыга илии баттааһыны сэҥээрдилэр.

Дойдулар Азербайджаны Нахчыван Автономнай Өрөспүүбүлүкэтин кытта Армения сиринэн-уотунан холбуур тырааныспар коридорын арыйарга сөбүлэстилэр.

«Зангезурскай коридорын» Арменияҕа сытар учаастага Америка хампаанньатыгар бэриллэр. Кинини «Трамп маршрута» диэн ааттаатылар. Трамп этэринэн, коридору АХШ салайар болдьоҕо 99 сылга диэри уһатыллыан сөп.

Армения уонна Азербайджан эйэ дуогабарын тиэкиһин бүгүн, атырдьах ыйын 11 күнүгэр, дьоҥҥо-сэргэҕэ таһаарыахтара.