Арсеньев аатынан “Уһук Илин” литературнай бириэмийэ сэттис сезонун финалистара ааттаннылар

Москваҕа В.К.Арсеньев аатынан “Уһук Илин” Бүтүн Арассыыйатааҕы литературнай бириэмийэ номинаннарын испииһэгин таһаардылар. Финалга үс номинациянан тоҕус айымньы киирдэ.

Бу сезоҥҥа 80 сайаапка киирбит. Бастаан эспиэртэр сүбэлэрэ уһун испииһэги сүүмэрдээбит, онтон дьоҕус дьүүллүүр сүбэ тоҕус финалиһы талбыт. “Кылгас проза” номинацияҕа “Осколки студеного лета” (Антонина Гилева), Алексей Небыков “Неодолимая тишина света. Русский хтонический рассказ” уонна “Тундра помнит” (Улита Котельникова) күрэстэһэллэр. “Уһун прозаҕа” финалистар испииһэктэригэр “Заветный берег” романынан Ольга Рожнева, “Золото Умальгы” кинигэтинэн Ольга Погодина, “Лилька” айымньытынан Лев Сысоров киирдилэр. “Оҕолорго прозалар” иһин Екатерина Згурская, Анатолий Валевскай, Надежда Ташлыкова киирсэллэр.

Бириэмийэ куратора Роман Косыгин финалистары талыы киритиэрийэ Уһук Илин уратытын көрдөрбүттэргэ туһуланар диэтэ.

Сэттис сезон уратытынан норуоттар икки ардыларынааҕы кыттыы буолла. “Литература Тихоокеанской России” бэстибээл көмөтүнэн тас дойдулартан сайаапкалар киирбиттэр.

Дьоҕус жюри чилиэнэ Екатерина Барбаняга Уһук Илиҥҥэ детективнэй устуоруйалар саамай киэҥник тэнийбиттэрин уонна эдэр ааптардар кыттыыларын бэлиэтээбитэ. Оттон улахан дьүүллүүр сүбэ чилиэнэ Олег Трушин сүрүн киритиэрий быһыытынан айымньы уус-уран өттүн уонна ааптар ураты истиилин көрөр санаалаах.

Бириэмийэни ахссынньы 5 күнүгэр Култуура пуондатыгар туттарыахтара.

В.К.Арсеньев аатынан Бүтүн Арассыыйатааҕы бириэмийэ РФ Бырабыыталыстыбатын Бэрэссэдээтэлин солбуйааччы – РФ Бэрэсидьиэнин УИФУо боломуочуйалаах бэрэстэбиитэлэ Юрий Трутнев көҕүлээһининэн ыытыллар.  Алта сезон устата Арассыыйа 49 эрэгийиэниттэн 700 сайаапка киирбитэ.

Сиһилии: https://www.sakha.gov.ru/news/14180