Артем Ларионов: Амарах дууһалаах, төлөннөөх сүрэхтээх

Биһиги ортобутугар араас дьон элбэх. Ыксаллаах быһыыга-майгыга, ыарахан кэмнэргэ үтүө санаалаах, амарах дууһалаах дьон көмөлөһөллөр. Дьэ, маннык хорсун, үтүө санаалаах эдэр ыччаттартан биирдэстэрэ — биһиги дьоруойбут Артем Ларионов. Кини — оскуола оҕото, ол эрээри бэйэтин баҕа санаатынан, олоххо көҕүнэн барыбытыгар холобур буолар. Байыаннай дьайыы саҕаланыаҕыттан бэйэтэ ас астаан, гуманитарнай көмө оҥорууга кыттар. Дьиҥ ис сүрэҕиттэн.

Бастакы хардыылар

Артём Ларионов — олоххо көхтөөх позициятынан биллибит уол. Илин-Сибиирдээҕи лиссиэйгэ үөрэнэр кэмигэр оскуола бэрэсидьиэнэ буолан, уопсастыбаннай үлэҕэ кыттара. Бу кэмтэн ыла бэйэ-бэйэҕэ көмөлөһүү, дьоҥҥо өйөбүл буолуу суолтатын өйдүүр. Дьон иннигэр эппиэтинэһи ылыныы, дьоҥҥо көмөлөһөр баҕа санаа эрдэттэн баар буолбут. Билигин П. И. Кочнев аатынан Тулагытааҕы орто оскуолаҕа үөрэнэр. Ил Түмэн иһинэн баар Ыччат парламенын, «Саха сирин аҕаларын лигата» уопсастыбаннай тэрээһин уонна волонтердар хамсааһыннарын чилиэнэ.

2024 сыл бүтүүтэ эдэр волонтер «Тулагы-Киллэм нэһилиэгин волонтердара» уопсастыбаннай хамсааһыны тэрийбитэ. Онно Тулагы агро-оскуолатын учууталлара уонна амарах санаалаах олохтоохтор киирбиттэр.

Кини өссө Тулагы оскуолатыгар Эр санаа уруоктарын ыытан, Арассыыйа Дьоруойа Игорь Юргины, Арассыыйа Дьоруойун аҕата Сергей Соболевы уонна байыаннай дьайыы волонтерун, бэйэтин настаабынньыгын Майя Аргунованы, ону тэҥэ байыаннай дьайыы бэтэрээннэрин ыҥыран көрсүһүү тэрийбит. «Саха волонтер оҕолор» тэрилтэни кытта «Бииргэбит — Вместе» диэн аахсыйаны тэрийбитигэр, оҕолор байыастарга анаан уруһуйдаабыттар. Ону тэҥэ оскуолатыгар Үтүө санаа муннугун уонна маскировочнай сиэккэлэри баайар киин тэрийбитэ, үөрэнээччилэр, учууталлар, нэһилиэк олохтоохторо уонна уопсастыбаннай тэрилтэлэр бэрэстэбиитэллэрэ кэлэн маскировочнай сиэккэлэри баайаллар.

Артем көҕүлээһининэн алын кылаас оҕолоро «Для СВОих» аһымал кэнсиэри оҥороннор, онно киирбит 100 тыһ. солк. байыаннай дьайыыга сылдьар биир дойдулаахтарыгар көмө ыыппыттар.

Байыаннай дьайыыга көмө

Байыаннай дьайыы саҕаламмытыгар Артем туора туран хаалбатаҕа. Тугу эмэ оҥоруохха наада диэн санааламмыта. Биир дойдулаахтарбыт туһугар ис дууһатыттан ыалдьар, көмөлөһөр санаалаах уол Хабаровскай госпиталларыгар сытар байыастарга ас астаан

ыытан саҕалаабыт. Маннык уустук кэмҥэ кыра да көмөнү оҥоруу — ис сүрэхтэн тахсар тылтан саҕалаан дьиэтээҕи аска тиийэ сүрэҕи-дууһаны сылаанньытар олус улахан суолталааҕын өйдөөбүтэ. Биир дойдулаахтарыгар көмөлөһөр, өйүүр баҕа санаата кини дириҥ патриот буоларын, киһилии сиэрдээх майгытын туоһулуур.

«Мин 2022 сыл олунньу 24 күнүттэн байыаннай дьайыы кыттыылаахтарыгар көмөлөһөн саҕалаабытым. Онно 15 саастаах этим. Бэйэм харчыбар гуманитарнай көмө атыылаһан ыытар буолбутум. Мин ким көмөҕө наадыйарга көмөлөһөн саҕалаабытым. 2024 сыл кулун тутар 14 күнүгэр олоҕум тосту уларыйбыта диэххэ сөп. Арассыыйаҕа Дьиэ кэргэн уонна Саха сиригэр Оҕо саас сылыгар аналлаах Гражданскай пуорумҥа Майя Галактионовна Аргунованы көрсүбүтүм. Онно кини сүбэтинэн, бурдук ас астааммын, Хабаровскай госпиталыгар волонтер Алена Васильевна Лебедкинаҕа ыыппытым. Ол кэннэ тиһигин быспакка, госпитальга сытар уолаттарга 100‑түү хоруопка аһы уонна наадалаах малы-салы ыытар буолбутум. Сороҕор гуманитарнай көмөнү хомуйууну биллэрэммин, 3,5 туоннаҕа тиийэ таһаҕаһы ыытабыт. Сүрүннээн баһыылкаларбытыгар бородуукта, таҥас, араас туттар мал-сал, тэрил угабыт. Баһыылкаларбыт дойду араас куораттарын — Москва, Санкт-Петербург, Иркутскай, Хабаровскай, Краснодар, ону тэҥэ Донецкай Норуодунай Өрөспүүбүлүкэ, Луганскай Норуодунай Өрөспүүбүлүкэ, Мариуполь уонна Запорожскай уобалас госпиталларыгар уонна байыаннай чаастарыгар тиийэллэр», — диэн эдэр волонтер Артем кэпсиир.

Москваҕа тиийэ

Волонтер уол 2024 сыллаахха күһүҥҥү сынньалаҥын кэмигэр, байыастарга көмөлөһөр сыаллаах, бэйэтин суотугар Москваҕа тиийэ сылдьыбыттаах. Ол туһунан бу курдук кэпсиир: «Москваҕа Саха сирин бэрэстэбиитэлистибэтигэр уонна «Саха волонтердар» хамсааһын ыстаабыгар сылдьыбытым. Онно госпиталларга илдьэр бородууктаны хомуйарга көмөлөспүтүм. «Бэс Чагда» санаторийга доруобуйаларын чөлүгэр түһэрэ сылдьар байыастарга ас илдьибитим. Кинилэр хас биирдиилэрэ болҕомтобут уонна көмөбүт иһин ис сүрэхтэн махтаммыттара. Онно туохтааҕар да күндү дьон махтала буоларын бигэтик өйдөөбүтүм. Кэлин Н. Н. Бурденко аатынан байыаннай госпиталь 8‑с филиалыгар Химкигэ сылдьыбытым. Онно Тулагы оскуолатын Любовь Григорьевна Дьячковская салайааччылаах бастакы кылааһын оҕолоро суруйбут суруктарын уонна уруһуйдарын тиэрдибитим. Бааһыран госпиталларга сытар уолаттарбыт эмтэнэр усулуобуйаларын көрөн баран өйөбүл олус суолталаах эбит дии санаабытым. Мин эрэ дьоҥҥо көмөлөһөр буолбатахпын, биһиги элбэхпит. Түгэнинэн туһанан, байыаннай дьайыы волонтердарыгар үтүө санааларын уонна өйөбүллэрин иһин махталбын тиэрдиэхпин баҕарабын. Хас биирдии волонтер көмөтүнэн Кыайыыны чугаһатар кыахтаахпыт!»

Билинии уонна өйөбүл

Тулагытааҕы учууталлара этэллэринэн: «Артем — олус эйэҕэс, үтүө санаалаах, бу хаачыстыбалара кинини волонтер үлэтигэр угуйаллар. Бэйэтин баҕатынан ас астаан, гуманитарнай көмө хомуйан, госпиталларга сытар биир дойдулаахтарбытыгар ыытар. Билигин волонтердар хамсааһыннарыгар киирэн, маскировочнай сиэккэлэри баайсар, тэрээһиннэргэ кыттар. Наһаа аламаҕай, үтүө санаалаах, амарах дууһалаах, көхтөөх оҕо».

Кини дьулуурдаах үлэтэ бэлиэтэнэн, киниэхэ «Байыаннай дьайыы кытыылаахтарыгар көмө оҥорбутун иһин» диэн бэлиэ туттарыллыбыта. Бу наҕараада — аҥаардас кини үлэтин билинии эрэ буолбакка, атын эдэр дьон уопсастыба олоҕор кыттыһалларыгар дьулуһууларын көҕүлүүр.

Артем Ларионов — эппиэтинэһи бэйэтигэр ылынартан куттаммат, Сахатын сирин олоҕор-дьаһаҕар көхтөөхтүк кыттар эдэр киһи үтүө быһыыта атыттары үтүөнү оҥорорго, бэйэ-бэйэҕэ көмөлөһөргө угуйар, бар дьоҥҥо холобур буолар.