Артем Семенов: «Минерализованнай балаһалары оҥоруу үлэтин күүһүрдэр сорук туруорулунна»

Бүгүҥҥү туругунан өрөспүүбүлүкэ 14 улууһугар: Абый, Үөһээ Бүлүү, Дьааҥы, Бүлүү, Горнай, Эдьигээн, Кэбээйи, Ленскэй, Мииринэй, Ньурба, Өлүөхүмэ, Орто Халыма, Сунтаар уонна Усуйаана улуустарыгар 66 ойуур баһаара баар. Баһаары утары 1680 киһи уонна 166 тиэхиньикэ үлэлиир.

Ньурба улууһугар Чаппанда нэһилиэгин аттыгар баһаар туран минерализованнай балаһалары оҥороллор. Ол туһунан Ньурба улууһун ойуурун хаһаайыстыбатын үлэһитэ Артем Семенов бу курдук кэпсиир:

— Баһаары умуруорууга үлэ тохтоло суох ыытыллар. Уопсайа 42 ойуур баһаарын утары сулууспа үлэһитэ, 9 тиэхиньикэ уоту утары охсуһар. Манна 253 га иэннээх сиргэ 12-НМ №-дээх ойуур баһаара баар, тыаллаах буолан уустук. Онон мас үрдүнэн уот тарҕаныытын ыыппат курдук сүрүн болҕомто онно ууруллар. Минерализованнай балаһалары оҥоруу үлэтин күүһүрдэр сорук туруорулунна. Бүгүн, атырдьах ыйын 8 күнүгэр, баһаар тахсыбыт сирин илин өттүгэр, хаттаан уот тахсыбатын курдук, утары уоту ыытар былааннаахпыт. Ону тэҥэ, салгыы дьаһал былаанын дьүүллэһии кэнниттэн, баһаарынай сулууспа салайааччыта Павел Павловы кытта квадрокоптерынан баһаардар кытыыларын бэрэбиэркэлээтибит.