Артур Олейников: «Хорсун буолууну, чиэһинэй майгыны ытыктыыбын…»

Сунтаар улууһуттан төрүттээх Артур Олейников байыаннай дьайыы саҕаланыан инниттэн хантараагынан сулууспалыыр. «Эр санаа» уордьанынан уонна “Хорсунун иһин” мэтээлинэн наҕараадаламмыта. Билигин уоппускаҕа сылдьар кэмигэр таба түбэһэн кэпсэттибит.

Устуоруйа уруогун ордорорум

– Мин оҕо эрдэхпиттэн байыаннай буолуохпун баҕарар этим. Кыра сааспыттан байыаннай буолууга үгүс сатабыл наадатын, бу идэ уустугун өйдүүр этим, ол эрээри, тоҕо эрэ талаһарым. Оскуолаҕа үөрэнэр сылларбар устуоруйа уруогун олус сөбүлүүрүм. Манна ордук саллааттар хорсун быһыыларын, киирсиилэри сэҥээрэрим. Оскуоланы бүтэрэн баран Новосибирскайдааҕы байыаннай училищеҕа туттарсан баран, доруобуйабынан бу үөрэххэ ылбатахтара. Харахпынан мэдиссиинэ хамыыһы­йатын ааспатаҕым. Үөрэххэ киирбэккэ кэлээт да аармыйаҕа барбытым. 2013  сыллаахха аармыйаҕа сулууспалаан кэлэн баран эһиилигэр Рязанскайдааҕы РВВДКУ училищеҕа киирэн икки сыл үөрэммитим. Бу кэнниттэн 2016 сыл­лаахха бэйэм байыаннай чааспын кытта хантараак түһэрсэн  күн бүгүнүгэр диэри сулууспалыы сылдьабын.

Сахалар түмсүүлээхтэрин сөҕөллөрө

2012-2013 сыллардаахха  Тиихэй акыйааннааҕы байыаннай-муора флотугар сулууспалаабытым. 2016 сыл­лаахтан хантараагынан сулууспалыыбын, бастаан быһаарыммыппын дьонум-сэргэм олус ыараханнык ылыммыттара, ол эрээри, быһаарыныыбын кытта сөпсөспүттэрэ. Спецназка сулуус­палаабытым ыраатта. Байыаннай дьа­­йыы саҕаламмытыгар бастаан сэттэ ый сылдьыбытым. Ол кэннэ уоппуска ылан сынньанан баран өссө үс ый сылдьыбытым. Байыаннай дьайыы саҕаламмыта үс ый буолбутун кэннэ быһыы­лааҕа, Дьокуускайга олорор биир билэр киһибиттэн байыаннай дьайыыга көмөлөһүөн сөптөөх дьон баарын-­суоҕун сураспытым. Снайпер буоларым быһыытынан бинтиэпкэбэр кыҥыыр тэрили (прицел) ылыахпын баҕарар этим. Анараа көрүллэр кыҥыыр тэриллэр соччото суох этилэрэ. Бэйэм талан кэмиэрчэскэйи ылыахпын баҕарарым. Ити кэнниттэн миэхэ өрөспүүбүлүкэ дьонуттан-сэргэтиттэн көмө бөҕөтө кэлбитэ. Төрөөбүт Сахабыт сирин өйөбүлүн, көмөтүн бастаан тутан баран олус соһуйбутум. Туох баар сэбинэн-сэбиргэлинэн хааччыйбыттара. Бу соторутааҕыта сахам дьоно миэхэ бин­тиэпкэ атыылаһан биэрбиттэрэ. Билигин ол бинтиэпкэбинэн дьарыктанабын, байыаннай дьайыыга үлэбин толорорго көмөлөһүө диэн эрэллээхпин. Бииргэ сулууспалыыр уолаттарым, өрөспүүбүлүкэҕит наһаа түмсүүлээх эбит диэн сөхпүттэрэ. Биригээдэбэр биир да саха суоҕа.

Бу билигин уоппускаҕа сылдьабын. Хантараак түһэрсии туһунан этэр ­буоллахха, биир, үс уонна биэс сыл­лаахтар бааллар. Мин үстүү сыл­лаах икки хантараагы түһэрсибитим уонна билигин биир сылга уһаттардым. Байыаннай дьайыы кэмигэр хантараак оннук  уһатыллар.

Түмүк

Мин эппиэтинэстээх, хорсун буолууну, чиэһинэй майгыны ытыктыыбын. Үгүс киһиттэн ыйыттахтарына, бары кэриэтэ маннык этиэхтэрин сөп. Ол эрээри, олоххо буолар араас түгэннэргэ үгүс киһи бу хаачыстыбаны тутуспат буолуон сөп.

Аҕата суох аҥаардас ийэҕэ улааппыппыт. Мин анныбынан икки балтылаахпын. Ол да иһин буолуо, кыра сааспыттан эппиэтинэһи сүгэ улааппытым. Оскуолаҕа үөрэнэр сылларбыттан дьиэ ис-тас үлэтигэр барытыгар ийэбэр көмөлөһөрүм. Тус олоҕум туһунан кэпсээтэххэ, кэргэним, оҕом суох. Инникитин олохпун оҥостон, ыал буолан дьиэ-уот тэринэр санаа­лаахпын. Кэлэр өттүгэр оҕолору, ыччаттары ба­­йыаннай-патриотическай иитиигэ туһулаан ытыыга дьарыктыахпын баҕарабын.