Артур Васильев саахымакка Толстой Куубагын блиц-турнирыгар кыайыыны ситистэ

Москва куоракка Л.Н. Толстой Куубагын иһин саахымат турнирын иккис түһүмэҕэ ыытылынна. Күрэхтэһии Л.Н. Толстой аатынан Судаарыстыбаннай түмэл филиалыгар буолан ааста.

Швейцарскай систиэмэнэн тоҕус туртан турар түргэн саахымат (блиц) турнирыгар 2008 сыллаахха төрөөбүт уонна онтон балыс саастаах 66 эдэр саахыматчыт кытынна. Саха сириттэн Артур Васильев, Давид Местников, Александр Иванов уонна Валерия Слепцова кыттыыны ыллылар. Бу туһунан Саха сирин саахымат Федерацията иһитиннэрэр.

2013 сыллаахха төрөөбүт уонна онтон аҕа саастаах уолаттар бөлөхтөрүгэр Артур Васильев 9  очукуоттан 8-һы ылан кыайыылааҕынан таҕыста. Давид Местников 7 очукуолаах төрдүс миэстэ буолла, эбии көрдөрүүлэринэн бириистээх миэстэҕэ тиксибиттэргэ баһыйтаран. Александр Иванов алта очукуолаах бэйэтин сааһын бөлөҕөр алтыс буолла. Оттон кыргыттар ортолоругар Валерия Слепцова түөрт очукуолаах бэйэтин бөлөҕөр бэһис миэстэҕэ тигистэ.

«Саахымат бырааһынньыгын чыпчаалынан аан дойду саамай эдэр норуоттар икки ардыларынааҕы маастара Роман Шогджиев уонна турнир кыайыылааҕа Артур Васильев икки ардыларыгар киирсиилэрэ буолла. Көрөөччү улахан интэриэһин тарпыт киирсии Шогджиев 1,5:0,5 ахсаанынан кыайыытынан түмүктэннэ», — диэн федерацияҕа кэпсээтилэр.