Артыыс Ефим Степанов үбүлүөйдээх күнүгэр “Мифология образа” кинигэ сүрэхтэниитэ буолуоҕа

Сэтинньи 9 күнүгэр, киэһэ 17.00 чааска, Былатыан Ойуунускай аатынан Саха театрыгар Россия народнай артыыһа, ССРС, РФ уонна СӨ Судаарыстыбаннай бириэмийэлэрин лауреата Ефим Николаевич Степанов 75 сааһын туолар өрөгөйдөөх үбүлүөйүн бэлиэтиэҕэ. 

Бу эрэ киэһэ көрөөччү кутун туппут улуу артыыс олоҕун, айар үлэтин кэрэһилиир “Мифология образа” диэн философия билимин кандидата, театровед Валентина Чусовская суруйбут кинигэтин сүрэхтэниитэ буолуоҕа.

Ытык киһибит үйэ аҥаарыттан ордук кэм устата Саха театрын сценатыгар оонньообут бастыҥ оруолларын үөрэнээччилэрин кытары толоруоҕа.

Уһулуччулаах артыыс араас сылларга ымыы гынан көтүппүт үөрэнээччилэрэ – билигин өрөспүүбүлүкэ араас театрдарынан айымньылаахтык үлэлии сылдьар артыыстар учууталларыгар сүгүрүйэн, махтанан туран дьоро киэһэни киэргэтиэхтэрэ.

Киириитэ босхо.

Бу сигэнэн киирэн босхо билиэти ылыныҥ: https://iframeab-pre5643.intickets.ru/seance/68016117/

Ефим Степанов 1974 сыллаахха Москваҕа М.С. Щепкин аатынан театр училищетын бүтэриэҕиттэн үйэ аҥаарыттан ордук кэм устата саха литературатын, нуучча драматургиятын, аан дойду уһулуччулаах айымньыларын дьоруойдарын Саха театрын сценатыгар тилиннэрэн көрөөччү хабыллар ытыһын тыаһыгар оонньоон кэллэ.

Саха театральнай искусствотын аар-саарга аатырдыбыт Чингиз Айтматов айымньытынан режиссер Андрей Борисов туруоруутугар  “Хаарыан хампа күөх кытылым” испэктээккэ Кириискэ оруолун толорон ССРС Судаарыстыбаннай бириэмийэтин ылбыта. В. Шекспир “Илиир Хоруол”  испэктээгэр Илиир Хоруол уобараһын итэҕэтиилээхтик арыйан Россия Судаарыстыбаннай бириэмийэтин Россия бастакы президенин Борис Ельцин илиититтэн туппута. Николай Лугинов “Чыҥыс Хаан ыйааҕынан” испэктээгэр Хохочой оруолун итэҕэтиилээхтик толорон Монголияҕа тиийэ аатырбыта.  Былатыан Ойуунускай “Улуу Кудаҥсатыгар” – уордаах Улуу Кудаҥса хатыламмат уобараһын арыйбыта.

Ефим Николаевич биир сүдү үлэтинэн театр түмэлин  салайыыта буолар. Театр артыыстарын, туруорууларын туһунан хаһыакка, сурунаалга тахсыбыт матырыйааллары хомуйан, былыргы хаартыскалары кичэйэн мунньан саха духуобунай култууратыгар тугунан да кэмнэммэт сүдү кылааты киллэрэр. Кини мунньубут матырыйаалларыгар, театр туһунан киэҥ билиитигэр олоҕуран историяны кэрэһилиир үс томнаах “Саха театрын антологията” уонна “Саха театра сылтан сыл” түөрт кинигэтэ тахсыбыттара.