Артыыстар ийэлэригэр — умнуллубат бэлэх

Саха тыйаатыра саҥаттан саҥа бырайыактары толкуйдаан олоххо киллэрэр.

Ол курдук, тыйаатыр идэлээх сойууһа көҕүлээбит «Ийэҕэ сүгүрүйүү» диэн көрсүһүүтүгэр артыыстар ийэлэрэ күндү ыалдьытынан буоллулар.

Тыйаатыр артыыстара Елизавета Потапова, Айаал Аммосов, Иннокентий Луковцев, Василий Борисов, Айталина Цыпандина уонна Ньургун Никитин күн күбэй ийэлэригэр тыйаатыр иһигэр экскурия тэрилиннэ.

Биир саамай долгутуулаах түгэнинэн артыыстар ийэлэрин кытары тыйаатыр испэктээктэрин уобарастарыгар киириилэрэ, онуоха көстүүмнэри талыы, гириими оҥостуу буолла. Ол курдук, ийэлэр «Дыгын Дархан», «Маһары. Ыраахтааҕыга айан», “Суоһалдьыйа Толбонноох”, “Алитет хайаҕа күрүүр”, “Тулаайах оҕо” уонна “Театрга буолбут түбэлтэ” испэктээктэргэ баар оруоллар таҥастарын-саптарын кэтэн түһүүлэрэ хаһан да умнуллубат өйдөбүнньүк бэлэҕинэн буолла.

(Тыйаатыр пресс-сулууспата)