Арыгы атыытыгар эбии хааччах киирдэ

Кулун тутар 1 күнүттэн Дьокуускайга арыгы атыытыгар эбии хааччах киирбитэ. Ол курдук, элбэх кыбартыыралаах дьиэлэргэ уонна ол аттыгар баар уопсастыбаннай аһылык тэрилтэлэригэр арыгы атыытын бириэмэтэ хааччахтаммыта.

Онон элбэх кыбартыыралаах дьиэлэргэ уонна ол аттыгар баар  уопсастыбаннай аһылык тэрилтэлэригэр арыгыны күнүс 2 чаастан киэһэ 8 чааска эрэ диэри атыыланар көҥүллэнэр буолла.

Кулун тутар 3 күнүгэр буолбут куорат дьаһалтатын мунньаҕар бу хааччахтааһынтан сылтаан, 26 тэрилтэ сабыллыан сөп диэн эттилэр.

Бу 26 кафе, кулууп элбэх кыбартыыралаах олорор дьиэлэргэ, эбэтэр, ол аттыгар чугас бааллар. Баларга арыгы испит дьон түүннэри айдааран, олохтоохторго мэһэйдииллэрэ саарбаҕа суох.

— Куорат олохтоохторо бу дьыаланы салгыырбытын эрэйэллэр, онон бу хайысханы бастайааннай хонтуруолга тутуохха, элбэх сырдатар, быһаарар үлэни ыытыахха наада, — диэн Дьокуускай куорат аҕа баһылыга Евгений Григорьев сорудахтаата.