Арыгы атыытын хааччахтааһын салҕанар

Арыгы атыыта бэрээдэктээһин, сымыйа кафелары уонна «наливайкалары» утары охсуһуу салҕанарын туһунан Дьокуускай куорат мэрэ Евгений Григорьев суруналыыстары кытта көрсүһүүтүгэр эттэ. Кини куһаҕан дьайыы барыта арыгыны кытары сибээстээҕин, буруйу оҥоруу, өлөрсүү онтон тахсарын, онно сүрүн хардыынан арыгыны атыылыыр сирдэри сабыы уонна үлэлэрин хааччахтааһын буоларын тоһоҕолоон бэлиэтээтэ.

Мэр сокуону оҥорооччулары кытта бииргэ арыгыны атыылыыр миэстэлэр ахсааннарын аҕыйаттыбыт, чуолаан оскуолалар уонна уһуйааннар курдук социальнай тэрилтэлэр тастарыттан суох оҥордубут диэтэ. Маннык быһаарыы уопсастыбаннай куттал суох буолуутугар уонна дьон-сэргэ доруобуйаларыгар үчүгэй сабыдыаллаах.

Куорат баһылыга кэлэр өттүгэр уопсастыбаннай аһылык сирдэригэр ирдэбиллэри, арыгы атыытыгар көҥүлү биэриигэ өссө кытаатыннарар былааннаахтарын кэпсээтэ. Бу саҥа киллэрии, мэр этэринэн, арыгы атыыланар сирдэригэр өҥө уонна куттал суох буолуутун таһымын үрдэтиэхтээх уонна куоракка «наливайкалар» ахсааннарын өссө аҕыйатыахтаах. Сыыйа итирдэр утахтары атыытын куорат кытыытыгар таһаарыахтара. Дьэ, оччоҕо дьон-сэргэ баҕа санаата туолан, көҥүллүк тыыныа. Онон бу ылыллар миэрэлэр бары куорат эйгэтин табыгастаах уонна куттала суох оҥорууга туһуланаллар.