«Арыгы састааба суох пиибэ утаҕы иһэрдэбит» диэн сурах сымыйа дуу, кырдьык дуу

«Арыгы састааба суох пиибэ утаҕы иһэрдиигэ  билиһиннэрии экскурсиятын оҥоробут», — диэн биллэрии ФАПК «Якутия» тэрилтэ аатыттан социальнай ситимнэринэн тарҕаммыта. Бу чахчытын дуу, сымыйатын дуу билээри ФАПК «Якутия» тэрилтэҕэ эрийэн билистибит.

Тэрилтэ маркетолога Валерия Васильевна Сметанина бу туһунан санаатын үллэһиннэ:

— Биһиги тэрилтэбит икки собуоттаах. Ол курдук бастакы собуокка ликеро-водочнай утахтары оҥоробут. Иккис собуокка — арыгыта суох оҕолорго аналлаах гаастаах утахтар, артезианскай уу, кыбаас уонна улахан дьон иһэригэр пиибэ. Тэрилтэбит билиҥҥитэ экскурсиялары 12-лии киһиэхэ тиийэ испииһэк хомуйан тэрийэбит. Ол эрээри, арыгыта суох пиибэ утаҕы биһиги собуоппут оҥорон таһаарбат. Оҕолорго аналлаах бородууксуйаларбытыгар «Азия оҕолоро» артезианскай уу, «Лайт» диэн гаастаах утахтар, чэйдэр буолаллар. Ону сэргэ, сайыҥҥы өттүгэр кыбаас оҥорон атыылыыбыт. Кыбааспытыгар арыгы састааба суох, ол эрээри оҕоҕо иһэрдэри дуу, иһэрдибэти дуу төрөппүттэр бэйэлэрэ быһаараллар. Биһиги оҕолорго пиибэ иһэрдэр экскурсиялары хаһан да оҥорботохпут, онон социальнай ситимҥэ тарҕаммыт сурах сымыйа буолар.