Арыгы содулуттан киһини кырбаан өлөрбүт эр киһи бириигэбэрэ таҕыста

Дьокуускай куорат суута 36 саастаах Дьокуускай куорат олохтооҕор сыһыаннаан холуобунай дьыаланы көрдө. Кини РФ Холуобунай кодексатын 111-с ыстатыйатын 4-с чааһынан (соруйан доруобуйаҕа ыар эчэтиини оҥоруу, сэрэҕэ суохтан эмсэҕэлээччи өлүүтүгэр тиэрдибит) буруйданар.

Силиэстийэнэн быһаарыллыбытынан, быйыл балаҕан ыйыгар сууттанааччы туоһу дьиэтигэр ыалдьыттыы сылдьан, эмсэҕэлээччини кытта арыгы испиттэр. Эмсэҕэлээччи хоско киирэн муостаҕа ииктээбитин сөбүлээбэккэ, илиитинэн-атаҕынан сынньыбыт. Уһуктубут дьиэ хаһаайына сууттанааччы дьайыытын тохтоппут, эмсэҕэлээччини дьиэттэн таһырдьа таһаарбыт уонна салгыы арыгылаабыттар. Сотору кэминэн дьиэ хаһаайына эмсэҕэлээччини дьиэ аанын таһыгар сиргэ сытарын булбут. Ол кэннэ эр киһи өлбүтэ быһаарыллыбыт.

Суут мунньаҕар сууттанааччы  буруйун кытта сөбүлэспит, өлөрөр санаата суоҕун быһаарбыт. Дьокуускайдааҕы куорат суутун бириигэбэринэн эр киһи буруйдааҕынан билинилиннэ уонна  8 сыл көҥүлэ быһылынна. Бириигэбэр сокуоннай күүһүгэр киирэ илик, диэн СӨ Сууттарын холбоһуктаах пресс-сулууспата суруйар.