Арыгылаары, доҕорун бэлисипиэдин уорбут

Дьокуускайдааҕы ИДьМ 3-с №-дээх салаатыгар олохтоох киһи 45 тыһ. солк. суумалаах бэлисипиэдин уордарбытын туһунан иһитиннэрбит.

Суһал-ирдиир үлэлэр ыытылланнар, маныаха үлэтэ суох 33 саастаах киһи уорбаланарын быһаарбыттар.

Быһаарыллыбытынан,  уорбаланааччы уоруу иннинэ доҕоругар ыалдьыттаабыт. Бииргэ аһыы утаҕы испиттэр, ол кэнниттэн уорбаланааччы салгыы баарга бараары гыммыт. Ол эрээри харчыта суох буолан биэрбит. Дьиэттэн тахсан иһэн хаһаайын бэлисипиэдин торуоһуттан быһан ылбыт. Уорбут тырааныспарынан баарга диэри айаннаан тиийбит уонна 3000 солк. атыылаабыт. Ол харчытынан салгыы испит-аһаабыт.

Уоруунан холуобунай дьыала тэрилиннэ.