Арыгыттан аккаастаныы нэдиэлэтэ — чөл олоххо хардыы

Арассыыйа Доруобуйатын харыстабылын министиэристибэтин көҕүлээһининэн,  атырдьах ыйын 18-24 күннэригэр Арыгыттан аккаастаныы нэдиэлэтэ биллэриллибитэ.

Нэдиэлэ сыала-соруга — арыгыны иһии мөкү содулларын туһунан нэһилиэнньэҕэ иһитиннэрии уонна куһаҕан дьаллыктан аккаастанарга ыҥырыы.

Арассыыйаҕа сыл аайы  арыгыны кытта сибээстээх 700 тыһыынчаттан тахса өлүү бэлиэтэнэр. Арыгыттан аккаастаныы нэдиэлэтэ — чөл олоххо хардыы.

Доруобуйа харыстабылын аан дойдутааҕы тэрилтэтэ  иһитиннэрэринэн, арыгыны иһии хроническай ыарыы сайдарыгар, киһи олоҕун таһыма намтыырыгар кутталлаах биир сүрүн чахчынан буолар.

Нэһилиэнньэ доруобуйатын уонна ыарыыны сэрэтэр өрөспүүбүлүкэтээҕи  киин методист-бырааһа Надежда Николаевна Кириллинаны кытары кэпсэттибит.

—Надежда Николаевна, арыгы киһиэхэ хайдах дьайарый?

— Биллэрин курдук,  арыгы этанол диэн күүстээх дьаат буолар. Арыгы истэххэ, киһи туох баар ис органнарын үлэтэ кэһиллэр. Ордук сүрэх-тымыр, ньиэрбэ систиэмэтэ, мэйии үлэтэ уонна ас буһарар органнар охсууну ылаллар. Арыгыһыт киһи олоххо интэриэһэ сүтэр уонна психиката алдьанар, олоҕо айгырыыр.

— Арыгы ханнык ыарыылары үөскэтэрий?

— Сыстыгана суох ыарыылар: сүрэх, быар, онкология, саахарынай диабет уо.д.а. үөскүүллэригэр  арыгы улахан оруолу оонньуур. Кардиолог-быраастар этэллэринэн, бэл, эдэр дьон арыгыны иһэр буоллахтарына,  гипертония, аритмия, инфаркт уонна инсульт курдук ыарахан ыарыыга ылларыахтарын сөп.

— Организмна буортута суох арыгы кээмэйэ диэн  баар дуо?

— Арыгы ханнык баҕарар өлүүтэ (дозата) – буортулаах. Бэл, күҥҥэ 50 г кытаанах арыгыны истэххэ,  быар цирроһун куттала 15% үрдүүр.

— Киһи арыгыттан аккаастаннаҕына туох уларыйыы буоларый?

— Арыгыттан аккаастаннахха, киһи уопсай туруга тупсар, сүрэх-тымыр үлэтэ чөлүгэр түһэр.

Онон сүбэлиэм этэ:

—Успуордунан дьарыктаныҥ;

-Сөптөөхтүк аһааҥ, уугутун хана утуйуҥ;

-Куһаҕан дьаллыктартан аккаастаныҥ;

-Таптыыр дьарыктаах буолуҥ;

-Чугас дьоннутун кытары алтыһыҥ;

-Айылҕаҕа сынньаныҥ.

Бу сүбэлэри тутуһан, олох хаачыстыбатын лаппа тупсарыахха, үгүс ыарыыны сэрэтиэххэ сөп. Эһиги доруобуйаҕыт бэйэҕититтэн тутулуктааҕын өйдөөҥ.

Чэгиэн буолуҥ!

Нэһилиэнньэ доруобуйатын уонна ыарыыны сэрэтэр өрөспүүбүлүкэтээҕи  киин пресс-сулууспата