Арыыга хаайтарбыт булчуттары бөртөлүөтүнэн быыһаатылар

Мэҥэ Хаҥалас улууһун Төхтүр сэлиэнньэтиттэн сылдьар булчуттар Өлүөнэ өрүскэ арыыга хаайтарбыттарын туһунан Быыһыыр сулууспаҕа иһитиннэрбиттэр. Бу туһунан СӨ бырабыыталыстыбатын бэрэссэдээтэлин бастакы солбуйааччы Дмитрий Садовников телеграм-ханаалыгар иһитиннэрдэ.

Быыһааччылар булчуттары бөртөлүөтүнэн быыһаабыттар, салгыы миэрэлэри ылынарга диэн тырааныспар полициятыгар туттарбыттар.

«Бу, хомойуох иһин, бастакы түбэлтэ буолбатах уонна өссө бүтэһик түбэлтэ да буолбатаҕа буолуо. Өрүскэ муус хамсыыр, устар кэмигэр куттал суоһуурун туһунан төһө да иһитиннэрии барарын үрдүнэн, булчуттар арыыга тахсалларын тохтоппоттор», — диэн Дмитрий Садовников суруйар.

Уу эбийиэктэригэр буруйу оҥорууну уонна быһылааны тахсыытын сэрэтэр, туоратар сыалтан, барыбыттан болҕомтолоох буолуу ирдэнэр. Уу эбийиэктэригэр куттал суох буолуута – биһиги барыбыт уопсай эппиэтинэспит. Бэйэбит уонна чугас дьоммут олохторун, доруобуйаларын харыстыыр туһугар, бары ирдэбиллэри тутуһан, сэрэхтээх буолуоҕуҥ! Этэҥҥэ сылдьыҥ!