Арыылаахха спортивнай былаһаакка тутулунна

Балаҕан ыйын 2 күнүгэр Сунтаар улууһун Арыылаах нэһилиэгэр икки бүк үөрүүлээх түгэн тосхойдо. Леонид Попов аатынан Арыылаах агротехнологическай орто оскуолатыгар саҥа үөрэх дьылын көрсө Бастакы чуораан чугдаарда уонна спортивнай былаһаакка аһыллыыта буолла.

Спортивнай былаһаакка «Үөрэҕирии» национальнай бырайыак  «Успех каждого ребенка» федеральнай бырайыагын чэрчитинэн тутулунна.

Күһүҥҥүлүү чаҕылхай күннээх, чэбдик салгыннаах үтүөкэн күн спортивнай былаһаакканы арыйыы үөрүүлээх түгэнигэр нэһилиэк баһылыга Иван Игнатьев, учууталлар, төрөппүттэр, үөрэнээччилэр кытыннылар.

Кыһыл лиэнтэни быһар чиэс оскуола дириэктэрэ Лидия Никитинаҕа, нэһилиэк баһылыга Иван Игнатьевка, физкультура учуутала Н.П. Петровка уонна оскуола бастыҥ спорстмена Марк Тихоновка тигистэ.

Былаһаакка аныгылыы тупсаҕай көрүҥнээх. Манна турниктарга, тренажердарга дьарыктаныахха сөп. Оҕолор кэлэн, чэбдик салгыҥҥа дьарыктанан, доруобуйаларын бөҕөрөгөтөр, чөл олоххо тардыһар анал миэстэлэннилэр диэн төрөппүттэр үөрэллэр.