“Ас-үөл бородууксуйата-2024” быыстапка-дьаарбаҥкаҕа 300 туоннаттан тахса бородууксуйа атыыланна

Балаҕан ыйын 25-29 күннэригэр  ыытыллыбыт “Ас-үөл бородууксуйата-2024” быыстапка-дьаарбаҥка кэмигэр Комсомуол болуоссатын былаһааккаларыгар 300 туоннаттан тахса бородууксуйа атыыланна.

Манна 80-тан тахса тэрилтэ уонна 12 муниципальнай улуустан, киин куораттан 16 агрооскуола бэйэлэрин бородууксуйаларын туруордулар.

Тэрийээччилэр эппиттэринэн, урукку сылларга курдук, дьаарбаҥканы Дьокуускай куорат олохтоохторо уонна ыалдьыттара  сэргииллэрин уонна күүтэллэрин атыы-тутуу элбээбитэ көрдөрөр.

Атыылаһааччылар ордук эт бородууксуйатыгар, балыкка, үүт бородууксуйатыгар уонна сымыыкка, сыырга, мүөккэ, барыанньа арааһыгар, сироптарга уонна оҕуруот аһыгар наадыйаллар.

Быйыл быыстапка-дьаарбаҥка 25-с төгүлүн ыытылынна уонна судаарыстыбаннй, уопсастыбаннай-бэлитиичэскэй диэйэтэл Степан Аржаков төрөөбүтэ 125 сылыгар ананна.