АСИ Дьокуускайга норуоттар икки ардыларынааҕы медиа-ырыынак контенын тэрийэн ыытыаҕа

Бу туһунан Ил Дархан Айсен Николаев «Саҥа бырайыактары олоххо киллэриигэ стратегическай көҕүлээһиннэри ааҕыныстыба» АНО креативнай экэниэмикэ киинин дириэктэрэ Екатерина Черкес-заде кытта ыам ыйын 30 күнүгэр креативнай индустрия пуорумҥа сөбүлэстилэр.

Global Entertainment Market (gem) норуоттар икки ардыларынааҕы контент ырыынага Арассыыйа бырайыактарын билиһинэрэргэ уонна норуоттар икки ардыларынааҕы партнердарын кытары сибээстэри олохтуурга кыаҕы биэриэҕэ. Хас да хайысхалар хабыллыахтара — анимация, геймдев уонна муусука.

Айсен Николаев АСИ кэлэктиибигэр өйөбүлүн иһин махтанна уонна Саха сирэ маннык көрүҥнээх дьаһаллары ылынарга бэлэмнээҕин бэлиэтээтэ.
«Биһиги өрөспүүбүлүкэбит Уһук Илиҥҥэ уонна дойдуга креативнай индустрия лидерэ. Ити үксүгэр АСИ-ны киллэрэн туран, федеральнай таһымнаах сайдыы уонна тэрилтэлэр институттарын экспертнэй өйөбүллэринэн ситиһилиннэ. Биһиги салгыы көдьүүстээхтик үлэлииргэ уонна саҥа сыаллары ситиһэргэ соруктаахпыт», — диэн Ил Дархан бэлиэтээтэ.

Екатерина Черкес-заде Саха сирэ бу салааны сайыннарыыга сүҥкэн оруоллааҕын бэлиэтээтэ, чуолаан, манна өссө икки сыл иһигэр тус ааҕыныстыба Москваҕа тэриллиэн иннинэ креативнай индустрияны сайыннарыы бастакы кэнсиэпсийэтэ оҥоһуллубута. Бу уопут билигин дойду 54 эрэгийиэнигэр киллэриллэн, сыл бүтүүтэ 70-тан тахса эрэгийиэҥҥэ олоххо киириэҕэ. Кини этэринэн, тэрээһин киэҥ бырагыраамалаах: контент оҥорооччулары уонна инвестордары кытта кэпсэтиилэр, индустрия лидердэриттэн лиэксийэлэр уонна маастар-кылаастар, эдэр исписэлиистэргэ лабораториялар, кросс- индустриальнай дьүүллэһиилэр, анимация үлэлэрин уонна киинэ көрдөрүүлэрэ, муусукааннар уонна АV-артыыстар кэнсиэртэрэ, технологиялар интерактивнай быыстапкалара.

«Ырыынакка оонньуу индустриятын бэрэстэбиитэллэрэ, муусука лейблара уонна цифровой платформа хаһаайыттара кэлиэхтэрэ. Кыттааччылар ахсааныгар Арассыыйаттан улахан оонньооччулар кэлэллэрэ күүтэллэр, ол курдук Okko, IVI о.д.а.», — диэтэ кини.
Саха сирин, Арассыыйа уонна омук ааптарскай киинэлэрин билиһиннэриитэ, ону таһынан аан дойдутааҕы копродукциялар аналлаах идиэйэлэр бааннара тэриллиэхтэрэ. Кыттааччылар инвестициялары уонна дистрибуциялары көрдөөһүҥҥэ баараҕай бырайыактары көрдөрүөхтэрэ, ону тэҥэ геймджемнарга кыттыахтара — хааччахтаммыт бириэмэҕэ оонньуулары оҥорууга күрэхтэһии.

Саҥа талааннары сайыннарыыга ураты болҕомто ууруллуоҕа. Ыччат киинэ лабораториятын чэрчитинэн бэйэбит үлэбитин билиһиннэрэр, ону тэҥэ нетворкинг-сиэссийэлэргэ профессионаллары кытта кэпсэтиэхтэрэ. Устудьуоннарга уонна саҥа исписэлиистэргэ аан дойдутааҕы эспиэрдэр кыттыылаах воркшоптар тэриллиэхтэрэ. Бу туһунан СӨ Ил Дарханын уонна Бырабыыталыстыбатын пресс-сулууспата суруйар.