Асида Алексеева: “Биһиги тэрилтэбитигэр 311 анал байыаннай дьайыы кыттыылааҕа реабилитацияны ааста”

Ил Дархан Айсен Николаев сорудаҕынан Юрий Павлович Степанов аатынан инбэлииттэри реабилитациялыыр өрөспүүбүлүкэтээҕи социальнай-медицинскэй киин анал байыаннай эпэрээссийэ кыттыылаахтарын уонна кинилэр дьиэ кэргэттэрин реабилитациялааһын салҕанар.

«Уопсайа 311 анал байыаннай дьайыы кыттыылааҕа уонна кинилэр дьиэ кэргэттэрин 267 чилиэнэ комплекснай реабилитацияны аастылар», — диэн атырдьах ыйын 22 күнүгэр ыытыллыбыт брифиҥҥэ инбэлииттэри комплекснай реабилитациялыыр өрөспүүбүлүкэтээҕи социальнай-медицинскэй киин дириэктэрэ Асида Алексеева иһитиннэрдэ.

Анал бырагыраама чэрчитинэн эт-хаан туругун чөлүгэр түһэрэргэ, эмоциональнай уонна мотивационнай эйгэни нуормалааһыҥҥа туһуламмыт социальнай-психологическай уонна социальнай-медицинскэй көмө оҥоһуллар.  Маны таһынан, тэрилтэ кэмиттэн кэмигэр байыаннай дьайыы кыттыылаахтарыгар уонна кинилэр дьиэ кэргэттэригэр тустаах тэрилтэлэр исписэлиистэрин кытта иһитиннэрэр уонна сүбэлиир үлэни ыытар. Уопсайа 55-тэн тахса араас управлениелары, тэрилтэлэри кытта көрсүһүү ыытылынна.