Аскалон Егоров айар киэһэтэ буолла

«Талба талаан»  саҥа бырайыак  ааспыт сыл ахсынньы 11 күнүгэр   Кэкэрдэ Зоя  айар киэһэтинэн саҕаламмыта. Айар  куттаахтар талааннарын арыйан көрдөрөр, айымньыларын иһитиннэр үтүө баҕа санаалаах бу бырайыак үлэтэ   тохсунньу 22 күнүгэр  «Ника» банкеттыыр саалаҕа салҕанна. 

«Айар Кут»  сойуус тэрээһининэн ыытыллар «Талба талаан» бырайыак чэрчитинэн,  Саха Өрөспүүбүлүкэтин  ырыа айааччыларын, СӨ байаанньыттарын, аккордеонистарын уонна гармонистарын сойуустарын чилиэнэ,  СӨ  үтүөлээх оhуокай этээччитэ, Нам улууhун «Отуу уота» литературнай түмсүү , «Туллук хаара» мелодистар түмсүүлэрин чилиэнэ,  бэйиэт, мелодист, ырыаhыт уонна  алгысчыт Аскалон Лукич Егоров-Өркөн Дьол айар биэчэрин, саха сиэринэн,  айыыларын айхаллаан, сиэлинэн сыт таһааран, арыылаах алаадьынан күндүлээн  кэлбит ыалдьыттарын айхаллаан көрүстэ

Суруйааччылар уонна хоһоонньуттар «Айар Кут»  эрэгийиэннээҕи түмсүү Өркөн Дьолу эҕэрдэлээтэ, баҕа санаа бастыҥын анаан махтал сурук туттарда. “Айар куттар” ис сүрэхтэриттэн иэйэн туран,  Аскалон Лукич суруйбут хомоҕой  хоһооннорун аахтылар. Хоһоон, ырыа дьоро түһүлгэтин сахалыы истиҥ сылаас тылларынан, сүүрэр уулуу сыыйа, уус уран тылларынан этитэлээн, кэпсээн-ипсээн, киэһэни иилээн-саҕалаан Саха Өрөспүүбүлүкэтин  култууратын  туйгуна Варвара Обоюкова ыытта.

Чахчы да чаҕылхай талааннаах, айдаарыылаах хоһоонньут, тойуксут, алгысчыт, баянист, суорумньуһут Аскалон Лукич Егоров айар үлэтин, олоххо  тус санааларын истэн саҥалыы  билсистибит, хоһооннорун, ырыаларын иһиттибит. Аскалон Лукич ырыалара ылланнылар, оһуокайа оонньонно.

Бу тэрээһиҥҥэ сылдьыбыт  СӨ Суруйааччыларын сойууһун,  Намнааҕы » Отуу уота» литературнай түмсүү чилиэнэ  Мария Мохначевская-Марта Мария санаатын маннык үллэһиннэ:

«Үөһээ Бүлүү Намыттан төрүттээх,  билигин Нам улууһун Түбэ  нэһилиэгэр олорор Аскалон Лукич Егоров-Өркөн Дьол киһи ааҕан сиппэт дэгиттэр талааннааҕын билэбит.  2022 сылга Аскалон Лукич 65 сааһын томточчу туолбута, саха тылын  үрдүк үөрэхтээх учуутала буолан,  элбэх салайар үлэҕэ үлэлээбитэ, оскуолаҕа дириэктэрдээбитэ, учууталлыыр кэмигэр элбэх ыччаты олох киэҥ аартыгар таһаарбыта. Биэчэри Аскалон Лукич бэйэтин алгыһынан арыйбытын кэннэ доҕоро, үтүөлээх оһуохай этээччи Анатолий Иванович кэрэ чуор куолаһынан оһуохай эттэ.

Аскалон Егоров  айар киэһэтигэр бэйэтин оҕо сааһын, тапталлаах аҕатын туһунан кэпсээнэ барыбытын уйадытта. Үөһээ Бүлүү Балаҕаннааҕыттан оскуолаҕа бииргэ үөрэммит доҕотторо кэлэн, кини туһунан кэпсээн сырдаттылар, кини хоһоонугар ырыа ыллаатылар.  “Айар кут” хоһоонньуттара тахсаннар Өркөн Дьол хоһооннорун ааҕан иһитиннэрдилэр. «Отуу уота» литературнай түмсүү салайааччыта Татаринов Алексей Михайлович-Удьурҕай «Отуу Уота» уонна Намнааҕы «Туллук хаара» түмсүүлэр ааттарыттан эҕэрдэ суруктары уонна сэмэй бэлэҕи туттарда».

Манна даҕатан эттэххэ, Аскалон Лукич биир үөрүүлээх сонуна диэн, бу күннэргэ кини «Өксөкүлээх Өлөксөй» диэн сахалыы, нууччалыы тылынан  аан бастаан суруйбут поэма- кинигэтэ бэчээккэ тахсыахтаах. Тылбааһын Мария Мохначевская-Марта  Мария оҥорбута. Биэчэри биллэр мелодист, ырыаһыт Константин Мохначевскай  бэйэтэ айбыт ырыаларын толорон киэргэттэ. Тыл этиэн, баяҥҥа ыллыан, алгыстарын тиэрдиэн баҕалаахтар элбэхтэр. Аскалон Лукичка айар үлэтигэр өссө үрдүк ситиһиилэри, тус олоҕор дьолу- соргуну баҕара хаалабыт!

Зоя ДАНИЛОВА-КЭКЭРДЭ