АСПОЛ “Арктика уонна мин” федеральнай куонкуруһу саҕалаата

Арктика тиэмэтигэр айар үлэ куонкуруһун АСПОЛ аан бастаан 2022 сыллаахха саҕалаабыта. Тэрээһин соруктарыттан биирдэстэрэ – дьиэ кэргэн төрүт үгэстэрин бөҕөргөтүү, Арктикаҕа наадалаах идэлэри тарҕатыы, ыччаты патриотизм тыыныгар иитии. Быйыл күрэхтэһии тиэмэтинэн “Арктика дьиэ кэргэнэ” буолуоҕа.

“Полярниктар ассоциациялара” МОО “Полюс земли” норуоттар икки ардыларынааҕы гуманитарнай-сырдатар киинэ Арктика эрэгийиэннэрин уонна Санкт Петербург үөрэнээччилэрин “Арктика уонна мин” федеральнай куонкуруска ыҥырар. Онон 2024 сылы дойду Бэрэсидьиэнэ Владимир Путин Дьиэ кэргэн сылынан биллэрбитинэн, быйылгы куонкурус Арктика дьиэ кэргэнигэр ананар.

Куонкурус үс номинациянан барыаҕа. 1-4 кылаас үөрэнээччилэрэ уруһуйдарын ыытыахтара, 5-9 кылаастар Арктика дьиэ кэргэнин туһунан эссе суруйуохтара. 10-11 кылаастар видеоролик бэлэмниэхтэрэ.

Үлэлэри 2024 сыл сэтинньи 22 күнүгэр диэри konkurs@aspolrf.ru электроннай буостанан ыытыахтаахтар. Куонкурус эрэгийиэннээҕи уонна федеральнай таһымҥа барыаҕа. Киирбит үлэлэри “Полярниктар ассоциациялара” МОО тэриллибит тэрийэр кэмитиэт сыаналыаҕа. Эрэгийиэҥҥэ бастаабыт үлэлэри аһаҕас куоластааһынынан социальнай ситимнэринэн ыытан, федеральнай таһымҥа кыайыылаахтары быһаарыахтара.

Куонкурус кыайыылаахтарын бириистэр, дипломнар, грамоталар күүтэллэр.

Пилотнай куонкуруска Санкт Петербург, Архангельскай, Мурманскай уобаластар оҕолоро кытыннылар. Тэрийэр кэмитиэт 2000 тахса үлэни туппута. Куонкурус географията салгыы кэҥээбитэ, Ненецкэй автономнай уокурук уонна Коми Өрөспүүбүлүкэтэ киирбиттэрэ. Быйыл Ямало-Ненецкэй уонна Саха сирин үөрэнээччилэрин ыҥырдылар. 2024 сылга куонкуруска Арктика 6 эрэгийиэнэ уонна Санкт Петербург кыттыахтара.

Куонкурус алтынньы 9 күнүттэн ахсынньы 31 күнүгэр диэри ыытыллар. Кыайыылаахтар ааттара ахсынньы 11 күнүгэр биллиэҕэ уонна ахсынньы 31 күнүгэр диэри наҕараадаланыахтара.

Куонкурус туһунан сиһилии билсиҥ:(https://www.aspolrf.ru/projects/earths-poles/konkurs-arctic-and-me/).

Саха Өрөспүүбүлүкэтин Ил Дарханын уонна  Саха Өрөспүүбүлүкэтин Бырабыыталыстыбатын пресс-сулууспата