Астанаҕа Көс омуктар оонньууларыгар Арассыыйа хамаандата остуол оонньууларыгар иккис миэстэҕэ тигистэ

Балаҕан ыйын 11 күнүгэр Астанаҕа ыытыллыбыт Аан дойдутааҕы Көс омуктар оонньууларыгар «Бес астык» остуол оонньуутун күрэҕэр дьахталларга Арассыыйа сүүмэрдэммит хамаандата  иккис миэстэни ылла.

Арассыыйа хамаандатын састаабыгар саха спортсменнара Аделина Потапова, Ольга Коротких, Кристина Терентьева уонна Вероника Иванова кытыннылар. Бу туһунан АГИКИ пресс- сулууспата суруйар. Бастакы күн Арассыыйа сүүмэрдэммит хамаандата Монголия хамаандатын  3:0 ахсаанынан кыайбыта. Иккис түһүмэххэ Чехия сүүмэрдэммит хамаандатын кытта киирсэн 3:0 ахсаанынан кыайыылаах тахсыбыта. Үһүс турга Турция хамаандатын 3:0 ахсаанынан кыайбыта. Иккис күн финалга Казахстан «А» нүөмэрдээх сүүмэрдэммит хамаандатын кытары оонньоон иккис миэстэҕэ тигистэ.

«Бэҕэһээ олус уустук оонньуу буолан ааста. Казахстан хамаандата олус күүстээх, кинилэр маастарыстыбалара сөхтөрөр. Мин 2017 сыллаахтан «Бес астык» остуол оонньууларынан үлүһүйэбин уонна Казахстаҥҥа күүстээхтэр хамаандаларын кытта киирсээри икки төгүл кытынным. Дьокуускайга доҕотторбутун хабылык уонна хамыыска остуол оонньууларыгар үөрэтэрбин саҕалаабытым. Хабылык уонна хаамыска остуол оонньууларын киэҥ араҥаҕа тарҕатар сыалтан инникитин Аан дойдутааҕы Көс омуктар оонньууларыгар успуорт көрҥүэ буолан киирэрин күүтэбин», — диэн Арассыыйа сүүмэрдэммит хамаандатын спортсмена Ольга Коротких кылгастык кэпсээтэ.