“Ася” санаата бөҕөх

“Ася” диэн ааттаах миэдик кыыс Бүлүү бөлөх улуустан төрүттээх. Кини байыаннай дьайыыга хайдах-туох сылдьарын маннык кэпсээтэ:

– Кэлбитим икки ыйтан орто. Баҕа өттүбүнэн көмөлөһө диэн кэлбитим. Идэбинэн медсиэстэрэбин эрээри, билигин анестезиологтыыбын. Миэдиктэр сүнньүнэн үс-түөрт буолан үлэлиибит. Эминэн-томунан хааччыллыы үчүгэй, барыта баар, тиийэр.

Биллэн турар, бааһырыы элбэх. Ыксаллаах быһыы-майгы үгүстүк буолар. Оскуолактан эчэйии элбэх. Бастакы суһал көмөнү оҥороот да, тэйиччи баар госпиталларга ыытабыт, үксүн бэйэбит арыаллаан илдьэбит.