Ат сылыгар төрөөбүт Лаверновтар

Өрөспүүбүлүкэҕэ биир саамай кэрэ кэргэннии паараларынан Айталина уонна Вячеслав Лаверновтар буолаллар. Томпо уонна Амма Кэрэ Куота Айталина Константинова уонна Өлүөхүмэ Кыыллааҕын Үрүҥ Уолана Вячеслав Лавернов иккиэн 1990 сыллаахха Ат сылыгар төрөөбүттэр. Лаверновтар үлэ киниискэтигэр биир эрэ суруктаахтар — 2013 сыллаахха Былатыан Ойуунускай аатынан Саха академическай тыйаатырыгар артыыһынан үлэҕэ киирбиттэр. Айар куттаах дьон 2025 сыл хайдах ааспытын уонна 2026 сылга туох былааннаахтарын ыал ийэтэ билиһиннэрдэ.

Айталина Лавернова, Саха академическай тыйаатырын артыыһа:

— Кэргэним Вячеславтыын биир эйгэҕэ үлэлиир буолан, үлэбитигэр тиийэ сиэттиспитинэн сылдьабыт диэххэ сөп. Кинитэ суох тугум да сатаммат курдук. Уруккута бэйэтэ тыйаатыр оҕото, билигин 7‑с кылааска үөрэнэр Колябыт түөртээх быраатын көрөр-истэр. Онон оҕоһуттаах дьон быһыытынан холкутук айабыт-тутабыт.

2026 сыл иккиэммитигэр олус бэлиэ сыл — ыал буолбуппут 15 сыллаах үбүлүөйэ. Бастаан утаа мин киниэхэ болҕомтобун уурбат этим. Онтон эрэпэтииссийэҕэ сылдьан олус эппиэтинэстээҕин, барыга бары дьоҕурдааҕын бэлиэтиир буолбутум. Ол курдук, тоһоҕо саайыыта буоллун, тыйаатыр араас тэрилин киллэрии-таһаарыы буоллун, быһата, туох үлэ көстөрүнэн бастакынан кини оҥоро сылдьар буолар. Ким да көрдөспөтөҕүн үрдүнэн, бэйэтин баҕатынан. Биһиги тапталбыт туоһуларынан буолбут бииргэ үөрэммит кэллиэгэлэрбитин Жанна Ксенофонтованы, Гаврил Менкяровы, Павел Колесовы, ити курдук киһи ааттыы турар өссө да үгүс Саха тыйаатырын сулустарын кытта хайаан да бииргэ үбүлүөйдүөхпүт.

Үгүспүт гороскоп бэлиэтинэн сөп түбэһиннэрэн, үүнэр сылы ханнык биллэр дьон бу сылга төрөөн ааспыттарынан “сыана быһар”. Ол курдук, Ат сылыгар төрөөбүт биллэр дьон ордук бэлиитикэ эйгэтигэр элбэхтэр эбит: Владимир Ленин (1870), Никита Хрущев (1894), Леонид Брежнев (1906), Нельсон Мандела (1918), Александр Лукашенко (1954) о. д.а. Уонна ырыаһыттар: Муслим Магомаев, Пол Маккартни (1942), Лев Лещенко (1942), Ани Лорак (1978), Нюша (1990) о. д.а.