Ат сылыгар төрөөбүт Максим Березин

Ньурба улууһуттан төрүттээх суруналыыс, ырыаһыт, СӨ Суруналыыстарын сойууһун «Кыһыл көмүс микрофон» бириэмийэтин хаһаайына, СӨ тэлэбиидэнньэтин уонна араадьыйатын туйгуна, «Саха» НКИХ продюсера Максим Березин Саха араадьыйатын дириэктэринэн үлэлээбитэ. Ат сылыгар төрөөбүт киһи диэх курдук, салайар талааннаах айар куттаах киһи бу күннэргэ үлэтэ күөстүү оргуйар. Онон Ат сылыгар улахан салайааччылар төрөөбүттэрэ мээнэҕэ буолбатах эбит дии саныыгын.

Максим Березин, 1978 сыллаах төрүөх, «Саха» НКИХ продюсера:

— Ылсыбыт дьыалабын тиһэҕэр тиэрдэ сатыыр буолан, быйылгы сыллааҕы былааннарбын үксүн этэҥҥэ толордум диэхпин сөп. Сыл аайы бэйэм холбун билинэн сорук туруорунабын. Ол курдук, массыынабын уларыттым, ийэ кынныбар сайылыгар кыладыапкатын туттум. Аны эһиилги сыл эппиэттээх тэрээһиннэригэр сүүрэ-көтө сылдьабын. Ол курдук, саҥа сылга үктэнээт, Суорун Омоллоон аатынан тыйаатырга тохсунньу 4 күнүгэр үөрүүлээх быһыыга-майгыга «Үрдэл» ырыа куонкуруһун түмүгүн таһаарабыт. Ол кэнниттэн тохсунньу 7 күнүгэр цииркэҕэ «Икки сулус» (“Две звезды”) ырыа бырааһынньыга буолуоҕа. Дьоро киэһэни Олег Колесов‑Талбан уонна Алена Антонова ыытыахтара. Куонкуруска «Саха» НКИХ суруналыыстара, оператордара, биллэр дьон, блогердар кыттыыны ылыахтара. Холобура, аатырбыт Лэгэнтэйи кытта суруналыыс Любовь Васильева ыллыахтара. Итинник болҕомтону тардар ырыаһыттар үгүс көрөөччүнү соһутуохтара. Аҕыс сыл тохтуу сылдьыбыт тэрээһини цииркэ салалтатын кытта бииргэ холбоһон тэрийэбит.