Ат сылыгар төрөөбүт Владислав Коротов

Сунтаар улууһуттан төрүттээх суруналыыс, хаартыскаҕа түһэрээччи, кэлэксийэниэр, кинигэ таһаарааччы Владислав Коротовы билбэт киһи ахсааннаах буолуо. Кини кэргэнэ Надежда Коротованы кытта өрөспүүбүлүкэҕэ ыытыллар бары сүрүн тэрээһиннэри хаартыскаҕа түһэрэн үйэтитэ сылдьалларын үгүстүк көрөбүт. Олоҕун кэрчигиттэн билиһиннэрдэххэ, 1954 сыллаахха — Ат сылыгар төрөөбүт Владислав Коротов Иркутскайдааҕы Хо Ши Мин аатынан педагогическай институту бүтэрэн, француз тылын учууталынан үлэлээбит. Үлэлиир эйгэтэ киэҥэ бэрт буолан, куйаар ситимигэр бэйэтэ тус саайтаах, онон интэриэһиргиир дьон кини туһунан сиһилии онтон билиэххитин сөп.

Владислав Коротов, СӨ үтүөлээх суруналыыһа:

— Быйылгы сыл иккис аҥаарыттан тэтимнээх үлэттэн дьэ холкутуйа түһэн, этэҥҥэ аһаран эрэбин. Ол иннинэ өрүү кинигэ суруйуутугар сылдьар буолан, аһыырбын да умнан ылааччыбын. Оннук бокуойум суох буолар. Сарсыардаттан киэһээҥҥэ диэри үлэнэн олорор буолан, Ат сыла миэхэ сөп түбэһэр. Ыйбынан Балык бэлиэтэбин. Онон бу эмиэ миэнэ: айар үлэ — олоҕум аргыһа. 56 сыл үлэ ыстаастаахпын. Сунтаар улууһун боксердарын туһунан 500 сирэйдээх кинигэ суруйдум. Успуорт энциклопедиятын оҥоро сылдьабын. Билиҥҥитэ 1850 спортсмен докумуоҥҥа тиһилиннэ. Сүрүннээн дьон кинигэтин эрэдээксийэлиибин. Сакаасчыт үлэбэр аҕалан, кумааҕынан өрөһөлүү кутан кэбиһэр. Эбэтэр көмпүүтэргэ таҥыллыбыт ботуччу матырыйаалы аҕалан туттарар. Сороҕор ол дьон ахтыыларыгар бэйэм мунньа сылдьар матырыйаалларбын эбэн биэрэбин. Ол эбэтэр аҥаарын курдугу бэйэбиттэн суруйан бэлэмниибин. Ат сыла — миэхэ үбүлүөйдээх сыл. Суруналыыстыкаҕа үлэлээбитим 25 сылын туолар. 2001 сыллаахха суруналыыстыка эйгэтигэр кэлбитим. Онтон ыла успуорду сырдатар суруналыыһынан үлэлии сылдьабын. Икки тылынан — нууччалыы да, сахалыы да холкутук суруйабын, хаартыскаҕа түһэриинэн дьарыктанабын.