Атах оонньуутугар – мэҥэлэр!

“Юность” чэпчэки атлетика манеһыгар сахалыы атах оонньуутугар өрөспүүбүлүкэ чөмпүйэнээтигэр Мэҥэ Хаҥалас, Чурапчы, Таатта, Нам, Хаҥалас, Горнай, Бүлүү, Үөһээ Бүлүү, Ньурба, Сунтаар, Кэбээйи, Булун, Дьокуускайтан “Модун”, Тулагы, ХИФУ кылыыһыттара, ыстаҥаһыттара, куобахчыттара түмсэн дьахталлар, бэтэрээннэр сэттэлии, эр дьон уон иккилии туостарга күрэхтэстилэр.

Кыһыҥҥы чөмпүйэнээт кыттыылаахтарын Баһылай Манчаары аатынан өрөспүүбүлүкэ киинин дириэктэрин солбуйааччы Иван Борисов, спортивнай солбугу бэлэмниир отдел начаалынньыга Семен Николаев, өрөспүүбүлүкэ атах оонньуутугар федерация толорооччу дириэктэрэ, күрэхтэһии сүрүн судьуйата Максим Оегостуров эҕэрдэлээтилэр. Университет устудьуоҥката, күрэхтэһиигэ кыттыбыт Сайаана Куо гитаралаах ырыата дьиэрэйдэ.

Дьахталларга Манчаары оонньууларын чөмпүйүөҥкэтэ Хаҥаластан Валерия Олесова үс көрүҥҥэ үһүөннэригэр бастаата. Мэҥэ Хаҥаластан Анна Лыткина иккис, Намтан Ангелина Иванова үһүс буоллулар.

35-49 саастаах бэтэрээннэргэ ньурбалар киэн туттуулара, номоххо киирбит атах оонньооччу, үс көрүҥ түмүгүнэн олохтообут рекорда билигин да куоһарыллыбакка турар Виталий Васильев кылыыга 25 м 49 см, ыстаҥаҕа 25 м 32 см көрдөрүүлэрдээх, муҥутуур кыайыылааҕынан буолла. Куобахха Бүлүү куобахчыта Прокпий Катанов 23 м 72 см түһэн бастаата, үс көрүҥ түмүгүнэн иккис үчүгэй көрдөрүүлэннэ. Намтан спорт маастара Максим Софронов үһүс миэстэлэннэ.

Эдэр-эмэн, оҕо саастарыгар мэлдьитин инники күөҥҥэ сылдьыбыт, билигин 40 саастаах успуорт вбэтэрээнэ, 40 саастаах Виталий Васильев санаатын үллэһиннэ: “Кыһыҥҥы сезоҥҥа көрдөрүүлэрим үчүгэйдэр. Ыстаныыларынан анаан-минээн дьарыктана иликпин. Үлэм сүнньүнэн үксүн тимиринэн дьарыктанабын. Уонна ыйааһыммын түһэрдэхпинэ формабар киириэм. Кылгас сэттэ эрэ ойууларга күрэхтэһэр буоламмыт чэпчэкитик бараҕын.  Атах оонньуута сайда турар, формабын тута сатыыбын. Доруобуйам көҥүллүүрүн тухары ыстанар былааннаахпын. МЧС-ка баһаарынай чаас байыаһабын, инньэ гынан, эт-сиин өттүнэн бэлэмнээх буолуу ирдэнэр. Оҕолорум үһүөн атах оонньуутун сөбүлүүллэр. Улахан уолум Оскар устудьуон. Миэстэлэспэтэр да күрэхтэһэрин олус сөбүлүүр. Мин кинини атын успуорка көрөбүн, бириэмэ көрдөрөн иһиэ. Кыра уолбут Марат ахсыс кылааска үөрэнэр.  Кыыспыт Лейсан уһуйааҥҥа сылдьар, эмиэ ыстаныан, дьарыктаныан баҕата сүрдээх. Кэргэним, ийэбит Александра фитнес-саалаҕа тириэньэрдиир. Онон спортивнай дьиэ кэргэммит диэххэ сөп. Тааттаҕа буолар Манчаары Оонньууларыгар  былааннанабын, сорук туруоруммутум. Ньурбам туһугар күрэхтэһиэм, доруобуйа баарын тухары”.

50-н үөһэ саастаах бэтэрээннэр сүһүөхтэрин үрдүгэр сылдьалларын, тэтиэнэхтэрин көрдөрдүлэр. 12-лэр. Үөһээ Бүлүү Мэйигин оскуолатын физкултуураҕа учуутала Василий Санников кылыыга бастаата, ыстаҥалаах куобаҕар үһүс буолуталаата уонна үс көрүҥ түмүгүнэн бастаата. Чурапчыттан Илья Дыдаев уонна Владимир Софронов иккис, үһүс миэстэлэргэ тигистилэр. Чурапчы бэтэрээннэрэ Дмитрий Макаров куобахха бастаата, Афанасий Дорофеев иккис буолла. Эдэр-эмэн саастарыгар аатырбыт Николай Санниковы, Иван Гороховы кытта бииргэ күрэхтэспит, өрөспүүбүлүкэҕэ миэстэлэһэр, дэгиттэр успуорт маастара, 69 саастаах Владимир Алексеев төрөөбүт-үөскээбит Сунтаарын аатыттан кытынна уонна кылыыга иккис миэстэлэнэн атах оонньуутугар уһуннук кыттыахха, күрэхтэһиэххэ сөбүн итэҕэттэ.

Күүтүллүбүтүн курдук, хатыһыылаах, илин-кэлин түсүһүүлэр күннэригэр сылдьар эр дьоҥҥо буоллулар. Мэҥэлэр күннээтилэр. Сергей Захаров кылыыга 44 м 62 см, ыстаҥаҕа 44 м 04 см түһүтэлээн бастаата. Куобаҕар 39 м 57 см түһэн иккис үчүгэй көрдөрүүлэннэ уонна абсолютнай чөмпүйүөн үрдүк аатын ылла. Ньурбаттан Эрэл Тихонов 41 м 25 см куобахтаан олус үчүгэй көрдөрүүнү ситистэ. Майа успуорт оскуолатын тириэньэрэ, өрөспүүбүлүкэ уһуну ойууга рекордсмена Игорь Скрябин 44 м 11 см кылыйан, 44 м 02 см ыстаҥалаан, 37 м 15 см куобахтаан үс көрүҥ түмүгүнэн иккис, Намтан успуорт маастара, тириэньэр Владислав Попов үһүс миэстэлэннилэр. Мэҥэ Хаҥалас атах оонньооччуларын ириэньэрдэр Борис Ильин уонна Петр Илларионов бэлэмнииллэр.

Өрөспүүбүлүкэ ыстаҥаҕа рекордсмена Горнайтан кыттар Чурапчы ыччата Кай Адамов кылыыга уонна ыстаҥаҕа үһүс буолуталаата. Тымныйа сылдьар буолан куобахтаабата. Өрөспүүбүлүкэ күүстээх маастардара Кэбээйиттэн Яков Дмитриев, Тааттаттан куобахха рекордсмен Андрей Васильев кыттыбатылар.

Ааспыт үйэ кынаттаах кылыыһыта, рекордсмена, дэгиттэр спортсмена Иван Горохов күрэхтэһии хаамыытын сыныйан көрдө, кыайыылаахтарга уонна бириистээх миэстэлэргэ тиксибиттэргэ наҕараадалары туттартаата.

Баһылай Посельскай,

Дьокуускай.