Хаартыска В.Яковлева тиксэриитэ
Горнай улууһугар Атамайга сэргэх күннэр буоллулар. Ол курдук, «Татьяна» диэн кафе-маҕаһыын үөрүүлээх быһыыга-майгыга арылынна.
Бу кэтэһиилээх, долгутуулаах уонна үөрүүлээх бэлиэ күн нэһилиэк дьаһалтатын баһылыга Айсен Павлов кэлэн итии-истиҥ эҕэрдэтин тиэртэ. Маҕаһыын хаһаайката Татьяна Алексеева кафе-маҕаһыыҥҥа киирии үөрүүлээх сиэригэр-туомугар аалай кыһыл лиэнтэни ытыс тыаһыгар доҕуһуоллатан быста. Куораттардыы кафе-маҕаһыыннаммыт дьон бары да үөрүүбүт улахан.
Маҕаһыын хаһаайкатын туһунан кыратык сырдаттахха, Татьяна Владимировна элбэх оҕо тапталлаах ийэтэ. Ийэ олоххо чахчы тулуурдааҕын уонна дьулуурдааҕын көрдөрөр. Этэргэ дылы, урбааҥҥа санаатыҥ да ылсыбаккын. Онон Татьяна маннык хоодуоттук уонна таһаарыылаахтык ылсан үлэлээһинэ бэйэтэ хорсун быһыы.
Кини полиграфияҕа ылсан үлэтин 2021 сыллаахтан саҕалаабыта, ону тэҥэ дьонун дьиэтин сөргүтэн маҕаһыын оҥостубута. 2022 сыллаахха попкорн, сахарнай вата оҥорор аппарааттары ылан, онно сөптөөх туспа хос оҥостубута. Кини, уопсайынан, табаарын, аһын-үөлүн дьон наадыйыытынан көрөн элбэтэн, саҥардан иһэр. Былырыын, 2023 сыллаахха дьону-сэргэни аһатар сири арыйарга былааннаан, хосторун куукуна гына оҥорбуттар. Үлэтин сайыннарар, кэҥэтэр санааланан, 2023 сыллаахха кирэдьиит ылбыт, саҥа кафе-маҕаһыын дьиэтин туттарбыт. Салгыы 2024 с. социальнай хантараакка докумуон хомуйсубут, биисинэс-былаан оҥостубут, хамыыһыйа иннигэр көмүскээбит. Ол түмүгэр эбии оһох атыылаһарга өйөбүл ылан, сайын малын-салын, тэрилин барытын тиэйтэрэн аҕалтарбыт, туруортарбыт. Онон сайын үгэннээн турдаҕына, кафе-маҕаһыына үлэтин саҕалаата.
Ыал ийэтэ ыарахантан саллыбакка, харгыстан иҥнибэккэ, сыал-сорук туруорунан төрөөбүт дойдутугар Атамайга күннэтэ итии астаах кафе-маҕаһыын арыйбыта барыбытын үөрдэр. Бэлиэтээн эттэххэ, бу нэһилиэккэ бастакы кафе буолар.
Манныгы этэн эрдэхтэрэ, көтөр күүһэ — кынатыгар, киһи күүһэ — дьулууругар диэн. Санаабытын саргылаан, ылсыбытын ыһыктыбакка, уустук диэн толлубакка, иннин диэки эрчимнээх эрдинэн, сыалын-соругун толорон, ыпсаран олоххо киллэрдэ.
Татьяна Владимировна бу үөрүүлээх күн күн күбэй ийэтигэр Аграфена Егоровнаҕа, оҕолоругар, чугас дьонугар үлэтигэр күүс-көмө буолалларыгар махтанна. Үөрүүлээх тэрээһиҥҥэ сылдьыбыт нэһилиэк олохтоохторо хардатын Татьяналарыгар махтаннылар.
Валентина Яковлева,
Атамай, Горнай.
Хаартыска ааптар тиксэриилэрэ.
Хаҥалас улууһун 1-кы Малдьаҕар нэһилиэгин олохтоохторо ааспыт өрөбүллэргэ бэлиэтэммит "Нэһилиэк күнүгэр" бэртээхэй сонуну истэн үөрдүлэр.…
Бу күннэргэ Амма улууһун баһылыга Степан Кузьмин кыстыкка киириигэ бэлэмнэнии чэрчитинэн улуус киинин хочуолунайдарын туруктарын…
Таатта Харбалааҕар Аҕа дойду Улуу сэриитигэр кыайыы 80 сыллаах үбүлүөйүн көрсө бэлэмнэнии үлэ саҕаланна. "Дьоһуннааҕы…
Бүгүн СӨ Урбааҥҥа, атыыга-эргиэҥҥэ уонна туризмҥа миниистирэ Тимур Ханды министиэристибэ үлэһиттэригэр «Туризмы сайыннарыы уонна территориальнай…
Балаҕан ыйын 14 күнүгэр "Мукучу нэһилиэгэ" МТ баһылыга Николай Иванович Левин, "Сарыал" түөлбэ салайааччыта Анна…
Нам улууһун баһылыга Юрий Слепцов анал дьаһалынан улуус социальнай-экэнэмиичэскэй сайдыытын пуондатын бырабылыанньата халаан уутуттан эмсэҕэлээбит…