Атамай кэскиллэрэ — «Кэскиллиин»

Горнай улууһугар Атамай оскуолатыгар оҕо хаһыатыгар «Кэскилгэ» кылааһынан анал сурутуу аахсыйата ыытыллыбыта. Онно оҕолор көхтөөхтүк кыттыбыттара, бука бары суруттарбыттара.

Кэтэһиилээх хаһыаппыт бастакы нүөмэрэ кэлбитин оҕолор үөрэ-көтө аахпыттара, санааларын үллэстибиттэрэ. «Кэскил» оҕо хаһыата — арахсыспат атаспыт, эрэллээх доҕорбут буолуоҕа диэн оҕолор бэлиэтииллэр. Хаһыаттан таайтарыылаах таайбараҥнары, ребустары, таабырыннары таайабыт, оҕолор суруйбут айымньыларын, уруһуйдарын, биллиилээх дьон оҕо саастарын, минньигэс ас ырысыаптарын, о.д.а. ааҕан билэбит диэн үөрэнээччилэр, төрөппүттэр, учууталлар үөрэбит. Оҕо кыра сааһыттан хаһыаты аахтаҕына, кини ааҕар дьоҕура сайдар, билиитэ-көрүүтэ кэҥиир диэн бэлиэтиибит.

Атамай кэскиллэрэ «Кэскил» хаһыаты доҕор оҥостоллор.

Матрена Ефремова,

Атамай, Горнай.

Хаартыска: Матрена Ефремова тиксэриитэ.