Атамай оскуолатын үөрэнээччилэрэ Дьокуускайга сэргэх тэрээһиннэргэ сырыттылар

В.Д.Лонгинов аатынан Атамай орто оскуолатын 2022-23 үө.дь. түмүгүнэн «Сыл бастыҥ кылааһа» буолбут 8 кылаас коллектива, салайааччы Акулина Филиппова, оскуола директора анаабыт «Дьокуускай куоракка путёвкатын» туһанан бэрт сэргэх тэрээһиннэргэ сылдьан кэллилэр.

Ол курдук, оҕолор этнография уонна мамонт музейыгар сылдьан элбэх саҥаны билэн-көрөн, сөҕөн-махтайан, квест оонньууга, аныгы интэриэһинэй центрдарга сылдьан дуоһуйа сынньанан үөрэн-көтөн кэллилэр.

Санатан этэр эбит буоллахха «Сыл бастыҥ кылааһа» күрэх Атамайга 2001 сыллаахтан саҕалаан күн бүгүҥҥэ диэри ситиһиилээхтик үлэлии турар.

Быйыл 22 төгүлүн бастыҥ кылаас оҕолоро путевканан өрөспүүбүлүкэбит тэбэр сүрэҕэр Дьокуускайга баран кэллилэр.

Оскуолабыт үтүө уопута улуус таһымыгар тахсан, «Сыл бастыҥ кылааһа» күрэх улуус бары оскуолаларын түмэн, оҕо, коллектив сайдарыгар дириҥ кылаатын киллэрэ турарыттан үөрэбит.

Оҕо бары өттүнэн сайдарыгар улахан суолталаах күрэҕи тэрийбит, тарҕаппыт оскуолабыт директорыгар Мотрена Ефремоваҕа оҕолор, төрөппүттэр ааттарыттан улахан махталбытын тиэрдэбит.

Татьяна Павлова