Атамай үөрэнээччилэрэ — Бүтүн Арассыыйатааҕы IV научнай күрэс кыайыылаахтара

В.Д.Лонгинов аатынан Атамай орто оскуолатын алын сүһүөх кылааһын алта эдэр чинчийээччитэ Бүтүн Арассыыйатааҕы «Юный исследователь» научнай бэстибээл финалыгар тиийэн дойдуларын аатын дуорааннаахтык ааттаттылар.

Бу далааһыннаах тэрээһиҥҥэ дойду араас эрэгийиэннэриттэн 300-тэн тахса оҕо кытынна. Оҕолор хас да түһүмэхтээх «Юный исследователь» кэмпириэнсийэ бүтэһик түһүмэҕэр ыҥырыллан, чинчийэр үлэлэрин улахан учуонайдар иннилэригэр көмүскээтилэр.

Ол курдук, Айсар Павлов (4 кылаас үөрэнээччитэ) «Социальные науки» сиэксийэ 1 үктэллээх лауреата буолла, ону тэҥэ кэмпириэнсийэ «Бастыҥ үлэтэ» муҥутуур үрдүк ааты ылан көмүс мэтээлинэн, сыаналаах бирииһинэн наҕараадаланна. Бэйэтэ сөбүлүүр дьарыгын остуол онньууларын, оҕо өйүн эрчийэрин, толкуйдуу үөрэнэрин, сатабылын үрдэтэр суолтатын эспиэртэр иннилэригэр эрэллээхтик дакаастаата. Салайааччылара Татьяна Павлова, Маргарита Степанова.

Чаҕыл Федоров (4 кылаас үөрэнээччитэ) «Краеведение» сиэксийэ 1 үктэллээх лауреата буолары ситистэ. Саха сиригэр биир бастыҥынан биллэр Федоровтар дьиэ кэргэн биэ үүтүттэн кымыс оҥорор сатабылларын көрдөрөн, утуму салгыыр ыччат буоларын кэпсээн көрөөччүлэр үрдүк биһирэбиллэрин, махталларын ылла. Салайааччылара Диана Федорова, Маргарита Степанова.
Динара Яковлева (3 кылаас үөрэнээччитэ) «Биология и медицина» сиэксийэ 1 үктэллээх лауреата. Баһаар кэнниттэн киртийбит үрэх уутун ыраастыыр аныгы тэрил үлэтин, нэһилиэнньэни ыраас уунан хааччыйыы туһунан, ыраас уу доруобуйаҕа улахан туһалааҕын чинчийэн эспиэртэр дьүүллэригэр дириҥник арыйда. Салайааччыта Саргылаана Иванова.

Слава Алексеев (3 кылаас үөрэнээччитэ) «Технические науки» сиэксийэҕэ 1 үктэллээх лауреат үрдүк аатын ылла. Бэйэ илиитинэн оҥоһуллубут турник уратытын, бөҕөтүн, экэнэмиичэскэй өттүнэн барыһын көрдөрөн сөхтөрдө. Салайааччы Саргылаана Иванова.
Арылхан Аввакумов (3 кылаас үөрэнээччитэ) «Экология» сиэксийэ 2 үктэллээх лауреата. Арылхан Бүтүн Арассыыйаҕа аатырбыт «Атамай мүөтүн» оҥорор Осиповтар дьиэ кэргэттэрин ураты дьарыктарын, мүөт оҥоруу кистэлэҥин, туһатын туһунан кэпсээн дьүүллүүр сүбэ үрдүк хайҕалын ылла. Салайааччы Саргылаана Иванова.
Коля Яковлев (4 кылаас үөрэнээччитэ) «Биология» сиэксийэ 2 үктэллээх лауреата. Коля эрэллээх доҕорун — Хаарчаана диэн ытын ураты боруодатын, майгытын туһунан кэтээн көрбүтүн, чинчийбитин кэпсээн көрөөччүлэр ураты тапталларын, биһирэбиллэрин ылла.

 

Бэстибээл чэрчитинэн ыытыллыбыт Бүтүн Арассыыйатааҕы интеллектуальнай олимпиадаҕа Айсар Павлов элбэх кыттааччытаан 3 миэстэҕэ таҕыста, үрдүк сыанаттан наҕараада тутта.

Хамаанданан күрэстэргэ үөрэнээччилэрбит эмиэ үрдүк ситиһиилэннилэр.

Ол курдук, «Волшебство науки» диэн тиэмэлээх бэйэни билиһиннэрии күрэхтэһиитигэр: саха алмааһынан, дьүкээбилинэн, тыйыс тымныытынан наука айылҕаны кытары быһаччы сибээһин көрдөрөн, көрөөччү болҕомтотун ылан муҥутуур кыайыылаах буоллулар.

Аны хамаандалар икки ардыларыгар ыытыллыбыт научнай квест-оонньууга 3 миэстэ буолары ситистилэр. Ити курдук, уопсай хамаанданан зачекка Бэс Күөлүн оҕолоро 3 миэстэҕэ тахсан дойдуларыгар улахан ситиһиини аҕаллылар.

Учууталлара, төрөппүттэрэ, биир дойдулаахтара үөрэбит, оҕолорбутунан киэн туттабыт. Дойдугутун ааттатар улахан патриот дьон буола улаатыҥ диэн алгыыбыт.

Татьяна Павлова,

Атамай, Горнай.

Татьяна Павлова хаартыскаларга түһэриитэ