Атамайга сэргэх тэрээһиннэр

Горнай улууһугар Атамай төрүттэммитэ 131 сылынан уонна «Ситим» уопсастыбаннай тэрилтэ тэриллибитэ 15  сылынан бэртээхэй тэрээһиннэр буоллулар.

«Ситим» бэлиэ сылынан «Атамайым инникитэ» дьылабыай оонньуу дьону-сэргэни түмтэ. Оонньууга уопсайа биэс хамаанда кытынна. Үөрүүлээх тэрээһиҥҥэ, долгутуулаах күрэскэ мустубут дьону нэһилиэк баһылыга Айсен Павлов эҕэрдэлээтэ. Дохсун ытыс тыаһыгар доҕуһуоллатан нэһилиэк сайдыытыгар кыһамньыларын ууран үлэлэһэр К.М.Васильеваҕа, Т.А.Павловаҕа улуус баһылыга Н.В.Андреев аатыттан махтал суруктары туттарда. Салгыы бу  уопсастыбаннай тэрилтэ салайааччыта Татьяна Павлова 15 сыл иһигэр ыытыллыбыт үлэни сырдатта, ону таһынан тэриллиитигэр үлэлээбит-хамсаабыт дьоҥҥо, грант кыайыылаахтарыгар махтал суруктары, сэмэй бэлэхтэри туттарда.

«Күһүҥҥү киһи күлбүтүнэн» диэн түөлбэлэр икки ардыларынааҕы күөн күрэс көхтөөхтүк ыытылынна. Манна «Скатерть-самобранка» күрэскэ дьон-сэргэ сайын олордубут оҕуруотуттан, сайыҥҥы быйаҥтан бэлэмнээбит аһын-үөлүн арааһыттан аҕалан кытыннылар. Быыстапка-дьаарбаҥка бэртээхэйэ буолла. Түмүккэ «Үрдэл» түөлбэ — I  миэстэни ылла. Иккискэ «Эрчим» түөлбэ, үһүскэ «Кэскил» түөлбэ  таҕыстылар. «Күһүҥҥү джаз» хаартысканан түһэр сири оҥоруу күрэхтэһиитигэр «Эрчим» түөлбэ кыайыылааҕынан таҕыста. «Кэскил» түөлбэ иккистээтэ, «Үрдэл» — үһүс буолла. Сынньалаҥ кэмигэр хас түөлбэ аайыттан эҕэрдэ нүөмэрдэр көрдөрүлүннүлэр. Манна «Ылбаҕай ырыаҕа» «Эрчим» — I миэстэ, «Кэскил» — II, «Үрдэл» — III буоллулар. «Флешмоб» тэтимнээх хамсаныылардаах үҥкүү түмүгүнэн кыайыыны «Эрчим» олохтоохторо ылан үөрдүлэр. Тилэх үктэспит «Кэскил» иккискэ таҕыста, «үрдэллэр» үсүһү ылан үөрдүлэр. Дьэ, ол курдук, тыҥааһыннаах түөрт түһүмэх кэнниттэн быһаарыллыбыт уопсай түмүккэ «Эрчим» түөлбэ кыайыылаах үрдүк аатын ылла. «Кэскиллээх» «Үрдэл» үөрэ-көтө иккис-үһүс бириистээх миэстэлэри үллэһиннилэр.

Маны сэргэ, «Бэһиэлэй эстэпиэтэ» күөн күрэс болҕомтону тарта. Алталыы спортсменнаах хамаандалар эрбии тииһин курдук эгил-тэгил кииристилэр. Түмүккэ быһый атахтаах, түргэн-тарҕан туттунуулаах «Эрчим» түөлбэ бастаата. «Үрдэллэр» иккискэ, «кэскиллэр» үһүскэ таҕыстылар. Күөн күрэс бары кыттыылаахтара грамоталарынан, мэтээллэринэн наҕараадаланнылар. Ити курдук, тапталлаах Атамайбыт тэриллибитэ 131  сылын өрө көтөҕүллүүлээхтик бэлиэтээтибит. Нэһилиэкпит үүнэ-сайда турарыгар үлэлиэх-хамсыах баҕабыт өссө күүһүрдэ.

Анна Дмитриева,

Атамай, Горнай.

Хаартыскалар ааптар тиксэриилэрэ