Атамайдар самаан сайыны көрүстүлэр (ВИДЕО)

Атамай нэһилиэгэр «Тирэх» уонна «Түһүлгэ симэхтэрэ диэн олус сэргэх үлэлээх түмсүүлэр бааллар.

Бу нэһилиэккэ холобур буолар бастыҥ үлэлээх «Тирэх» аҕам саастаахтар түмсүүлэрин Виктория Заровняева, «Түһүлгэ симэхтэрин» Варвара Ефремова сатабыллаахтык салайан үлэлэтэллэр. Түмсүүлэр нэһилиэккэ, улууска, өрөспүүбүлүкэҕэ ыытыллар тэрээһиннэргэ, күөн күрэстэргэ, көрсүһүүлэргэ көхтөөхтүк кытталлар.

Самаан сайын саҕаланыытын айылҕаҕа тахсан сиэри-туому тутуһан көрсөр үтүө үгэстээхтэр. Быйыл да эрдэттэн сүбэлэһэн, былааннаан, ох курдук оҥостон айылҕаҕа таҕыстылар, сайыны уруйдуу көрүстүлэр, айылҕаттан күүс-сэниэ ыллылар. Манна эбэн эттэххэ, бу түмсүүлэр кыттыылаахтара сатабылларын, билиилэрин-көрүүлэрин дьоҥҥо-сэргэҕэ, эдэр ыччакка тиэрдэргэ үлэлэһэллэр. Чуҥкуйары кыйдыыр, туһалааҕы оҥорорго дьулуһар, болҕомтону тардыбыт сэргэх үлэлээх түмсүүлэргэ дьон-сэргэ тардыһара үксээн иһэр.

Татьяна Алексеева,

Атамай, Горнай.

Хаартыска, видео: Татьяна Алексеева