Атамайга аҕам саастаахтар түмүстүлэр

Горнай улууһугар Атамайга аҕам саастаахтар дэкээдэлэрин чэрчитинэн «Славим возраст золотой» диэн улуустааҕы тэрээһин буолан ааста.

Манна Бэрдьигэстээхтэн, Солоҕонтон, Маҥаныттан, Аһыматтан, Күөрэлээхтэн аҕам саастаахтар түмсүүлэрэ кэлэн ыалдьыттаатылар. Бэлиэ тэрээһиҥҥэ кэлбит ыалдьыттары уруйдаан-айхаллаан көрсөн, саҥа баараҕай тутуубут дьиэтигэр экскурсиялатан, нэһилиэк устуоруйатын, олоҕун-дьаһаҕын, үлэтин-хамнаһын туһунан билиһиннэрдибит. Тэрээһин үөрүүлээх арыллыытыгар нэһилиэкпит баһылыга эҕэрдэлээн, махтанан туран нэһилиэктэр аҕа саастаахтарын түмсүүлэрин салайааччыларыгар махтал суруктары туттартаата. Салгыы нэһилиэктэр кырдьаҕастарын түмсүүлэрэ уопсастыбаннай олоххо кыттыыларын сырдатар матырыйааллары бэлэмнээн аҕаланнар, көрдөрдүлэр, кэпсээтилэр.

Ыҥырыылаах ытык мааны ыалдьыттарбытын нэһилиэкпит «Далбар Хотун», «Тирэх» түмсүүлэрэ уонна оскуола, оҕо уһуйаана, балыыһа үлэһиттэрэ астаабыт минньигэс астарынан күндүлээтибит. Бырааһынньыктааҕы эбиэт кэмигэр аһаҕас микрофоҥҥа ырыа-тойук арааһа ылланна, истиҥ кэпсэтии таҕыста.

Олохтоох бибилэтиэкэ билиини-көрүүнү тургутар оонньууну ыытта, таайбараҥ арааһын таайтарда, сэргэх викторина ыытылынна.
Кыраайы үөрэтэр түмэлгэ ууруллан сытар урукку кэмнэри көрдөрөр, кэпсиир хаартыскаларынан быыстапка бэртээхэйэ тэриллиннэ. Маны сэргэ, нэһилиэк аайыттан биирдии маастар-кылаас ыытыллыбытын биһирээтилэр. Уран тарбахтаахтар талааннарын, сатабылларын сөҕө-махтайа көрдүлэр.

️Эдэрдии эрчимнээхтик үөрэ-көтө күрэхтэһэн, илин-кэлин түсүһүү буолла. Биирдиилээн күрэстэргэ кыттан бастыҥ сыал табааччылар ааттаннылар, мэтээлинэн наҕараадаланнылар. Бу курдук күн устата олус үчүгэй суолталаах уонна сэргэх тэрээһин буолан ааста.

Күндү ыалдьыттарбытыгар, улууспут нэһилиэктэрин аҕа саастаах дьоммутугар, ыҥырыыбытын ылынан тэрээһиҥҥэ кыттыбыттарыгар, Атамайбытыгар кэлэн ыалдьыттаабыттарыгар махтанабыт. Куруутун бу курдук эдэрдии эрчимнээхтик, ыллаан-туойан, үөрэн-көтөн, доруобай чөл туруктаах буолалларыгар баҕарабыт. Тэрээһиммит үрдүк таһымнаахтык ааһарыгар бииргэ үлэлэспит, сүүрбүт-көппүт дьоммутугар, АКСК «Атамай» бары үлэһиттэригэр, ыалдьыттары көрсөргө көмөлөспүт үөрэнээччилэрбитигэр, волонтер оҕолорбутугар, ас арааһын астаабыт нэһилиэкпит тэрилтэлэригэр, уо.д.а. барыларыгар ис сүрэхтэн тахсар махтал мааны тылларын аныыбыт.
Инникитин да бу курдук түмсэ туруоҕуҥ.

Олохтоох дьаһалта

Хаартыскаларга Татьяна Алексеева түһэриилэрэ,

Атамай, Горнай.