Атамайга — дьиэ кэргэн пуорума

Горнай улууһугар Атамайга улуустааҕы «Родные — Любимые» дьиэ кэргэн пуорума үрдүк таһымҥа буолан ааста.

Пуорум дьиэ кэргэн өрөгөй ырыатынан саҕаланна. Үөрүүлээх быһыыга-майгыга улууспут баһылыга Никита Андреев мустубут дьоҥҥо итии-истиҥ эҕэрдэтин тиэртэ итиэннэ улуус таһымнаах үрдүк наҕараадалары туттарда.

Мустубут ыалдьыттарга туһаайан нэһилиэк баһылыга Айсен Павлов саамай үрдүк сыаннас дьиэ кэргэн буоларын бэлиэтээтэ, наҕараадалары туттарда. Нэһилиэк дьиэ кэргэттэрэ туруорбут «Вальс» үҥкүүлэрэ, «Долгууна» бөлөх саҥа үҥкүүтэ ытыс тыаһынан арыалланна, биһирэбили ылла.

Ол кэнниттэн панельнай аһаҕас кэпсэтии бэрт сэргэхтик ыытылынна. «Олох төрдө — дьиэ кэргэн» диэн ааттаах кэпсэтии ыҥырыылаах ыалдьыттарынан буоллулар: Никита Викторович Андреев, Горнай улууһун баһылыга; Сардаана Степановна Стручкова, Горнай улууһун баһылыгын бастакы солбуйааччыта; Саргылаана уонна Айтал Никаноровтар, «Дьиэ кэргэн-2025» Бүтүн Арассыыйатааҕы онус үбүлүөйдээх куонкурус “Эдэр ыал” анал аатын кыайыылаахтара; ⁠Тыгыйык Күн Боотур сиэнэ, психолог, маркетолог, урбаанньыт; ⁠Татьяна Андреевна Ли-Фу, нутрициолог-диетолог; ⁠Вилена Антоновна Михайлова «vil-тур» туристическай фирма салайааччыта; ⁠Ариан Алексеевич Александров, үлэҕэ уонна бэйэни көмүскэнии Саха Сиринээҕи киинин салайааччыта, Горнай улууһун аҕаларын түмсүүтүн бэрэссэдээтэлэ, улуус мунньаҕын дьокутаата.

Кэпсэтиини иилээн-саҕалаан ыытта Атамай орто оскуолатын методиһа, «СИТИМ» уопсастыбаннай тэрилтэ салайааччыта Татьяна Павлова.

Нэһилиэктэр талба талааннаахтарын, уһуйаан, оскуола оҕолорун, учууталларын, төрөппүттэрин оҥоһуктарынан олус интириэһинэй, баай быыстапка көрдөрүүгэ туруорулунна, атыы-кутуу арааһа тэрилиннэ.

Күн иккис аҥарыттан былаһааккаларынан үлэлэр ыытылыннылар. Ыҥырыылаах ыалдьыттар, спикердэр бэйэлэрин сатабылларын, билиилэрин кытары үллэстэһиннилэр, сүбэ-ама биэрдилэр, ирэ-хоро кэпсэтии бэрт сэргэх буолла.

Манна уопсайа 5 былаһаакка үлэлээтэ: «Здоровое поколение: питание как основа успеха»; «Успешный ребенок: формула достижений»; «Единая семья: ценности в цифровую эпоху»; «Финансовая грамотность»; «Роль отца в воспитании ребенка».

Маны сэргэ, эр дьон былаһааккатыгар биир ураты сүүрээнинэн, бу күн бааттаах илиилээхтэр 2026 сыл бастакы аҥарыгар «Байанай» сурунаалы тутар буоллулар, ону сэргэ 50 л ГСМ, уотунан барар дружба тутан өттүкхаралаах, илии тутуурдаах дьиэлээтилэр.

Күн устата улуус кииниттэн «Аниматор-Ленд» диэн сынньалаҥы тэрийэр бөлөх оҕолорго анаан оонньуу арааһын тэрийдэ, онон  ураты сэргэх тэрээһини буолла.

Улахан суолталаах Дьиэ кэргэн пуорума Атамай нэһилиэгэр үрдүк таһымнаахтык ааһарыгар сүүрбүт-көппүт, үлэлэспит, киэргэппит, тэрийсибит бары дьоммутугар, тэрилтэлэрбитигэр бука барыларыгар олохтоох дьаһалта махтанар. Инникитин да бу курдук түмсүүлээх буолуоҕуҥ.

Атамай нэһилиэгин дьаһалтата

Хаартыскалар нэһилиэк дьаһалтатын тиксэриилэрэ