Атамайга — истиҥ көрсүһүү, сэргэх тэрээһин

Атамайга нэһилиэк олохтоохторун уонна оскуола үөрэнээччилэрин кытта истиҥ көрсүһүү буолла.

СӨ Ытык сүбэтин чилиэнэ, СӨ норуотун хаһаайыстыбатын үтүөлээх үлэһитэ, Горнай уонна Уус Алдан улуустарын бочуоттаах олохтооҕо, 1983-1988 сс. «Атамай» сопхуос дириэктэрэ Иннокентий Васильевич Бочкарев, биир дойдулаахпыт СӨ үтүөлээх бырааһа, доруобуйа харыстабылын туйгуна Авксентий Авксентьевич Филиппов ыалдьыттаатылар.

В.Д.Лонгинов аатынан Атамай орто оскуолатын кэлэктиибин, үөрэнээччилэри кытта бэртээхэй көрсүһүү тэрилиннэ. Иннокентий Васильевич «Родная земля — хранительница памяти» кинигэтин туһунан сырдатта, «Атамай» сопхуос туһунан кэпсээтэ. Байыаннай-патриотическай кулууп иитиллээччилэрэ арыаллаах, Кыайыы болуоссатыгар Дьоруой Владимир Лонгинов пааматынньыгар сибэкки дьөрбөтүн уурдулар.

Күн иккис аҥарыгар Алексей Алексеевич Петров бааһынай хаһаайыстыбатыгар, саҥа МФЦ дьиэтигэр сырыттылар, нэһилиэнньэни кытары көрсөн, урукку кэми ахтан-санаан аастылар.

Матрена Ефремова,

Атамай, Горнай.

Хаартыскалар ааптар тиксэриилэрэ