Атамайга кыһыннарын атаардылар

Горнай улууһугар Атамайга Кыайыы болуоссатыгар дьон-сэргэ сарсыардаттан тоҕуоруста.

Бу Арассыыйаҕа Дьиэ кэргэн, Саха сиригэр Оҕо саас, Горнай улууһугар Урбаанньыт, Атамайга Патриотизм сылларынан «Дорообо, сандал саас!»  диэн кыһыны атаарыы тэрээһинэ  ыытылынна. Күн-дьыл да бэйэтэ анаан туран биэрбит курдук буолла. Онон мустубут дьон ыытыллыбыт күрэхтэһиилэргэ, куонкурустарга көхтөөхтүк кытыннылар. Болуоссат тула атыы-эргиэн дьаарбаҥката тэриллибитэ, болҕомтону эмиэ тарта.

Тэрээһин туһунан кылгастык сырдаттахха, уһуйаан уонна оскуола оҕолоругар «Сааскы таммахтар» диэн хоһоон ааҕыытыгар күрэс олус үчүгэй (сал. Никифорова С.А.) буолла. Оҕолор турунан бэлэмнэммиттэр, онон хайҕалы ылыахтарын ыллылар. Салгыы хаатыҥка быраҕыытыгар, аттракционнарга, о.д.а. араас көрдөөх оонньууларга (сал. Атамайдааҕы сынньалаҥ киинэ) кыттааччы элбэҕэ үөртэ. Ону таһынан, түөлбэлэр (ТОС) икки ардыларыгар күрэхтэһиилэр эмиэ олус сэргэхтик ыытылыннылар. «МАСЛЕНИЦА — КРАСНА ДЕВИЦА» чуучаланы оҥорууга, «САМОВАРОВНА» сылабаардаах киэргэтиллибит мааны остуолу тардыыга, «ЗАДОРНЫЕ ЧАСТУШКИ» көрдөөх-нардаах частушкалары толорууга, ону таһынан «Бэһиэлэй эстэпиэтэҕэ» дьон-сэргэ түмүстэ, күлсүү-салсыы, үөрүү-көтүү көҕүлүттэн тутулунна.

Тэрээһин түмүгэр кыайыылаахтар ааттаннылар. Ол курдук, «МАСЛЕНИЦА — КРАСНА ДЕВИЦА» бырааһынньык чуучалатын оҥорууга түөлбэлэр илин-кэлин түһүстүлэр. Киэргэтии, уратытык оҥорорго толкуй бөҕө буоллулар. Түмүккэ «Кэскил» түөлбэ бастаата. Иккис бириистээх миэстэҕэ «Эрчим» түөлбэ таҕыста. Үсүһү «Үрдэл» түөлбэ олохтоохторо ылан үөрүү-көтүү өрөгөйө буолла.

«САМОВАРОВНА» күрэхтэһиитэ эмиэ көрдөөхтүк, олус бэркэ барда, табылынна. Түмүккэ эмиэ «Кэскил» түөлбэ инники күөҥҥэ тахсан, үөрүү-көтүү бөҕө буоллулар. «Эрчимнэр» иккистээтилэр, «Үрдэл» түөлбэлэр үһүстээтилэр.

Тэбэнэттээх, көрдөөх-нардаах тыллардаах частушкалары толорууга бу да сырыыга «эрчимнэр» түһүнэн кэбистилэр. Тилэх үктэһэн, «үрдэллэр» иккискэ тахсан өрө тыыннылар. «Кэскиллэр» үсүһү ылан, «үһүс да миэстэ» дэстилэр.

«Бэһиэлэй эстэпиэтэҕэ» түөлбэлэр алталыы чулуу спортсменнарын хамаандаҕа киллэрдилэр. Дьэ, ох курдук оҥостубут, кустук курдук куоһаммыт спортсменнар эрбии тииһин курдук эгил-тэгил эристилэр, илин-кэлин түһүстүлэр. Болуоссат күлсүүнэн, үөрүүнэн, ыалдьааччылар хаһыыларынан өрө ньиргийэн олордо. Манна «Эрчим» түөлбэ олохтоохторо бастыыр туһугар туох баар сыраларын-сылбаларын ууран тиритии-хорутуу буолла. Онон кинилэргэ кыайыы өрөгөйө буолла. «Кэскиллэр» иккискэ тахсан үөрдүлэр. «Үрдэл» үһүстээтэ.

Тыҥааһыннаах 4 түһүмэх кэнниттэн, «Эрчим» түөлбэлэр кыайыы көтөллөнөн сэртипикээтинэн наҕараадаланнылар (ИП «Осипов И.И»). Кыайыылаах «Эрчимҥэ» түөлбэтигэр баал эбилиннэ. Иккис миэстэҕэ эрэллээхтик үктэммит «Кэскил» түөлбэлэр ИП «Васильев А.М» олохтообут сэртипикээтин ылан, «Алёна» маҕаһыын диэки барар буоллулар. «Үрдэл» түөлбэлэр ( ИП «Филиппов Д.А», «Астык» маҕаһыын, бэкээринэ) эмиэ сэртипикээтинэн наҕараадаланнылар. Сыраласпыппыт таах хаалбата диэн үөрдүлэр.

Сааскы бырааһынньыктарынан эҕэрдэлээн туран, бу күн «Аптаах Vibe» эҕэрдэ кэнсиэр буолла. Фокусник, иллюзионист Дьулустан Павлов, үтүөкэн ырыаһыт Харысхан Мойтохонов, «Үрдэл — 2023» күрэс финалиһа, чаҕылхай ырыаһыт ⁠Аман Ankharob, уус-уран тыллаах ыытааччы (тамада) Федосий Наумов үөрүүлээх дьоро күнү тупсаран, ситэрэн-хоторон биэрдилэр. Саҥа 2024 сылга биир бастыҥ, ураты кэнсиэри нэһилиэк дьоно сэргэтэ дуоһуйа көрдө, хас биирдии нүөмэр ытыс тыаһынан арыалланна. Манна эбии киирии билиэтинэн бэртээхэй бириистэр оонньоммуттара дьону-сэргэни өссө сэргэхситтэ.

Түгэнинэн туһанан, тэрээһиҥҥэ бука бары биир сомоҕо буолан кыттыбыккытыгар, үөрүүнү тэҥҥэ үллэстибиккитигэр махтанабыт. Ону тэҥэ, тэрээһиннэри өрүү өйүүр спонсордарбытыгар ИП «Осипов И.И», ИП «Васильев А.М», «Алёна» маҕаһыыҥҥа, ИП «Филиппов Д.А», «Астык » маҕаһыыҥҥа, бэкээринэҕэ. ИП «Алексеева Т.В», «Татьяна» маҕаһыыҥҥа махтанабыт, үлэҕит таһаарыылаах буоллун диэн баҕа санаабыт бастыҥын тиэрдэбит.

Анна Дмитриева,

Атамай.

Ааптар хаартыскаларга түһэриитэ.