Салгыы
Атамайга төрөппүттэр кэмпириэнсийэни сэҥээрдилэр

Атамайга төрөппүттэр кэмпириэнсийэни сэҥээрдилэр

Ааптар:
21.04.2024, 12:30
Хаартыскаҕа Ю.Аввакумова түһэриитэ
Бөлөххө киир:

Горнай улууһугар Атамайга «Радуга» уһуйааҥҥа «Дьиэ кэргэн — олох төрдө. Саҥа көрүүлэр…» диэн төрөппүт кэмпириэнсийэтэ уонна уһуйаан төрөппүттэрин уопсай мунньаҕа ыытылынна.

Бу нэһилиэкпитигэр Дойдуга бэриниилээх буолуу, улууска Предпринимательство, Саха сиригэр Оҕо саас, Дойдубутугар Дьиэ кэргэн сылларыгар ананна. Мунньахха 3 бөлөхтөн 24 төрөппүт кыттыыны ылла. Уһуйаан сэбиэдиссэйэ Диана Федорова 2023-24 үөрэх сылыгар ыытыллыбыт тэрээһиннэри сырдатта, уһуйаан инники үлэтин тосхолун кэпсээтэ.

Кыра оҕолор бөлөхтөрүн иитээччитэ Татьяна Яковлева кырачааннар сатабыллара күһүҥҥүттэн саҕалаан төһө эбиллибитин туһунан кэтээн көрүүлэрин билиһиннэрдэ, сырдатта. Төрөппүттэр ону олус сэргээтилэр, болҕомтолорун уурдулар.

Орто бөлөх иитээччитэ Варвара Кирова оҕолор күннээҕи эрэсиимнэрин, дьарыктарын туһунан иһитиннэрии оҥордо. Манна төрөппүттэр ыйыталлара, чопчулаһаллара элбэх буолла.

Улахан оҕолор бөлөхтөрүн иитээччитэ Эльвира Данилова оскуолаҕа киирээри сылдьар оҕо туох, хайдах бэлэмнээх буолуохтааҕын, тугу билиэхтээҕин, төрөппүт туохха болҕомтону ууруохтааҕын кэпсээтэ. Манна эмиэ төрөппүт ыйытыыта элбэх. Киэҥ кэпсэтии таҕыста.

Психолог Фекла Егорова бу ый устата оҥорбут мониторинг түмүктэрин төрөппүттэргэ билиһиннэриитин бары да сөбүлээтилэр, сэҥээрдилэр. Музыкальнай салайааччы Юлиана Аввакумова оҕо тыына сайдарыгар аналлаах маастар-кылааһы ыытта, буолаары турар » Ойор -тэбэр, ыллыыр-туойар оҕо саас» күрэс туһунан сиһилии сырдатта. Төрөппүттэр маастар-кылааһы, күрэһи истэн сэргээтилэр. Бэйэлэрэ кытары арыт үөрэнэрбит элбэх диэн бэлиэтээтилэр.

Мунньах иккис чааҺыгар төрөппүттэр санааларын иһиттибит.
Мария Сергеева психолог идэлээҕин быһыытынан биллэр педагогтар этиилэриттэн саамай сөпсөһөр ньыматын туһунан кэпсээтэ. «Правила 3 минут» курдук методикалар төрөппүттэр, иитээччилэр сэҥээриилэрин ылла. Элла Аввакумова оҕо талаанын таба тайанан, өйөөн, өйдөөн арыйдахха оҕо сайдар диэн кэпсээнин олус сөбүлүү иһиттибит. Саргылаана Иванова оҕону кыра сааһыттан төрөөбүт төрүт тылынан саҥара үөрэтиэххэ диэн тиэмэҕэ санаатын үллэһиннэ. Дьиэ кэргэнигэр туттар ньымаларын сырдатта. Елизавета Ефремова дьиэ кэргэнигэр уолаттары үлэнэн иитии педагогикатын кэпсээтэ, сэҥээриини ылла. «Эр хоһуун» аҕалар түмсүүлэрин салайааччыта Дмитрий Аввакумов оҕону сымнаҕастык, албыннаһан иитэр ньыматын кэпсээтэ, кырачаан урбаанньыт оҕолорун туһунан сырдатта. Онуоха ыйытыы элбэх буолла, сүбэ-ама да ыллылар. Василий Павлов бэйэтин холобурунан иитэрин, сорудаҕы кыыс, уол диэн араарбакка, кыра саастарыттан барытын сатыырга үөрэтэллэрин, улэнэн иитэллэрин туһунан кэпсээтэ. Мунньах кыттыылаахтарын хайҕалын ылла.

Бары төрөппүттэр көхтөөх, тэрээһинтэн туора турбат дьон буолалларын быһыытынан, оҕолорун бэйэлэрин холобурдарынан иитэллэрин көрдөрдүлэр, кэпсээтилэр. Онон барыбытыгар олус туһалаах тэрээһин  буолла. Эдэр ийэлэр, аҕалар маннык тэрээһиннэри көтүппэккэ сыдьаллара буоллар диэн баҕа санаалаахпыт. Быыс булан кэлбит, бэйэлэрин  үөрүйэхтэрин кэпсээбит дьоммутугар сэртипикээттэри туттардыбыт. Маннык тэрээһин кэмиттэн-кэмигэр ыытылларыгар баҕардыбыт.

Раиса Иванова -Арылыйа,

Атамай, Горнай.

Хаартыскаларга Юлиана Аввакумова түһэриитэ.

+1
1
+1
0
+1
0
+1
0
+1
0
+1
0
+1
0
Бары сонуннар
Салгыы
30 мая
  • 16°C
  • Ощущается: 15°Влажность: 55% Скорость ветра: 2 м/с

Сообщить об опечатке

Текст, который будет отправлен нашим редакторам: