Сунтаар Хаданыттан Монголияҕа атынан баран иһэр айанньыттар 58 саастаах Роман Попов уонна 61 саастаах Геннадий Пустоляков Бурятияҕа тиийдилэр.
Аттарын мэччитэ сылдьаллар.
Кинилэр Хадантан атырдьах ыйын 15 күнүгэр арахпыттара. Ыйы быһа айаннаан, көмүстээх Бодойбоҕо тиийбиттэрэ. Кинилэр саха атын тургутар сыаллара суох, өбүгэлэрэ айаннаабыт суолларын, олорбут сирдэрин чинчийэр баҕалаахтар. Былыр Бүлүү улуустарын сахалара Бодойбоҕо (Тайҕаҕа) тахсан эргинэллэрэ, таһаҕас таһаллара. Бу кинилэр сылдьыбыт аҕай суолларын омоонун булан, аныгы дьон бэйэлэрин тургуталлар.
Салгыы Улуу Солко суолунан түҥ былыр өбүгэлэрбит олоро сылдьыбыт сирдэригэр, Байкалга, Монголияҕа тиийэр былааннаахтар. Үс ыйынан эргиллэн кэлэргэ суоттаналлар. Кэлэллэригэр кыһын буолан, массыынаҕа тиэллиэхтээхтэр.
Арамааннаах Геннадий оҕо эрдэхтэриттэн маннык айанныахтарын, сири-дойдуну көрүөхтэрин баҕараллар эбит. Биэнсийэҕэ тахсан баран, бу ыра санааларын толорорго санаммыттар. Дьэ, чахчыта, уонна хаһан?
Айаннаан иһэн, Арамаан айылҕа, сир-дойду уларыйыытын сонургуур хараҕынан көрөн, айан күчүмэҕэйдэрин туһунан сахалыы толкуйдарын видеоҕа устан, сэһэргии иһэр. «Конный турпоход Якутия-Монголия 2024 год» диэн телеграм-ханаалларыгар таһааран иһэллэр.
Холобур, Бодойбо диэки сыһыы-хонуу суох, хайалаах дойду, ат аһыыр ото букатын суох эбит, онно күчүмэҕэйдэри көрсүбүттэр. «Бэл, кутааҕа мас умайан быстыбат», — диэн сөҕөллөр. Хаста да аттарын куоттара сылдьан баран, туппуттар. Айанньыттар сиргэ хоно сылдьаллар, кутаа оттон, чэй өрүнэллэр, таһаҕастарын барытын акка тиэнэ сылдьаллар. Биирдэ эмит сэлиэнньэҕэ киирэн хоноллор, сууналлар, тото-хана аһыыллар. «Массыынаҕа таһаҕаһы, аһы, оту тиэнэ сылдьыбакка, суол тугу тосхойорунан айанныыр санааҕа да астык», — дэһэллэр айанньыттар.
Кинилэргэ олохтоох дьон, ааһан иһэр айанньыттар, суоппардар хото көмөлөһөллөр эбит. От, бурдук булан биэрэллэр, аттарын боккуобун уларыталлар, аһаталлар, сууннараллар, сүбэлииллэр, ыйаллар, бэл, кэлиэхтээх дэриэбинэҕэ билэр дьоннорун «көрсүҥ» диэн сэрэтэллэр. Суолга сахалары көрсөн, үөрэ-көтө хаартыскаҕа түспүттэр, бииргэ чэйдээбиттэр.
Мууйа оройуонугар кинилэри олохтоох дьаһалта көрсүбүт, «Муя-инфо» хаһыакка суруйбуттар.
Айанньыттар билигин Северомуйскай сэлиэнньэтиттэн тахсан, Байкал күөл диэки айаннаан иһэллэр. Онно көмүс күһүн күлүмүрдээн турар. Бурятияҕа сир-дойду омооно уларыйан, сыһыы-хонуу элбээн, айылҕа кэрэ көстүүтүнэн умсугутар.
«Куттала суох уонна хаачыстыбалаах суоллар» национальнай бырайыак чэрчитинэн «Кэбээйи» айан суолугар Хатыҥ Үрэҕи туоруур муоста…
Байыаннай дьайыы кэмигэр "мин дьыалам буолбатах" диэн туора туран хаалбыт киһи суоҕа чахчы. Биллэр-көстөр көмөнү…
Тустууктар Роман Дмитриев, Павел Пинигин уонна Александр Иванов 1976 с. Монреаллааҕы Олимпиадаҕа ситиһиилэрин туһунан "Триумф"…
Арассыыйа энергетическэй нэдиэлэтин чэрчитинэн “Энергетика” хайысхатыгар ыытыллыбыт Госсэбиэт хамыыһыйатын мунньаҕа дойдуга уот ситимэ эрэллээх, көдьүүстээх…
“Күһүҥҥү киһи күлбүтүнэн” диэн этэллэрэ сөптөөх да эбит. Балаҕан ыйын 25 күнүттэн 29 күнүгэр диэри…
Ааспыт сууккаҕа өрөспүүбүлүкэҕэ буруйу оҥоруу туһунан СӨ борокуратуура иһитиннэрэр. Дьокуускайга баан счетуттан 350 тыһ.солк. уоруллубут.…