Аттаах айанньыттары дойдуларыгар чиэстээтилэр

Монголияҕа тиийэ ыҥыырдаах атынан барбыт айанньыттар дойдуларыгар, Хадаҥҥа, этэҥҥэ тиийдилэр. Сунтаар улууһун дьаһалтата көмөлөһөн, аттарын Дьокуускайтан дьоҕус бырысыапка тиэйэн илдьибиттэрэ. Бастаан Роман Попов аттарын, онтон Геннадий Пустоляков аттарын илтилэр. 

Массыына Сунтаартан төннөн кэлиэр диэри Геннадий куоракка хаалан, волейболга күрэхтэспитэ. Роман ол кэмҥэ убаһаларын идэһэлэммитэ.

Онтон дьэ, Хадан кулуубугар биир дойдулаахтара ас-үөл тардан,  көрсүһүү дьоро киэһэтин тэрийбиттэрэ. Дойдуларын аатын ааттаппыттарыгар махтаммыттара. Сунтаар улууһун тыа хаһаайыстыбатын бастыҥ үлэһит дьонун бэлиэтиир үөрүүлээх тэрээһиҥҥэ кинилэри эмиэ чиэстээбиттэрэ, улуус баһылыгын махтал суругун туттарбыттара. Маны тэҥэ, Пустоляковтар аймах бу айан хаартыскатынан альбом-кинигэ оҥорторон, айанньыттарга бэлэхтээтилэр.

Кинилэри түөрт ый анараа өттүгэр, атырдьах ыйын 15 күнүгэр хадаттар алҕаан атаарбыттара. Ол устубуттарын көрдөххө, сиэр-туом толоруллубутун, тыл-өс этиллибитин кэнниттэн, иккиэн иккилии аты сиэппитинэн, кыра таһаҕастарын ындыыламмытынан, суол устун киирэн бара тураллар. Бу кэмҥэ кинилэри туох күүтэрин туох билиэй?

Санаан көрдөххө, уустук ээ. Иннилэригэр киэҥ нэлэмэн тайҕа, аата-ахса суох үрэхтэр, улахан өрүстэр, хайалар сыттахтара. Хас хардыыны оҥорон, хас көһү баран, ханна, хаста сиргэ, иччитэх өтөххө хонон, хаарга-самыырга баттатан, ханна адьырҕа кыылы көрсөн, тиийиэхтээх сирдэрин булуохтарай? 3 тыһыынча килэмиэтири оннооҕор массыынанан да айанныыр уустук буоллаҕа. Онтон бу түҥ тайҕанан, суола-ииһэ, ат сиир ото суох сиринэн, таас хайалары уҥуордаан, сүүрүктээх үрэхтэри, өрүстэри туораан, тас дойдуга тиийэргэ быһаарыныы диэтэххэ, дьэ, хорсун санаа диэтэҕиҥ.

Арай, Арамааннаах Геннадий саха эр киһитин сиэринэн,  чугас эргин айанныырга, сиргэ хонорго үөрүйэх, сылгыһыт, булчут, сатабыллаах эр бэртэрэ буоланнар, санаалара бөҕөх буоллаҕа. Кинилэр төһө да биэнсийэлээх буоллаллар, сааһырбыт дьон да ыраах, ыарахан сырыыны кыайалларын, атын норуот чулууларын кытта тэҥҥэ эриһэллэрин көрдөрдүлэр, өбүгэлэрин суолларын сөргүттүлэр.

Хата, аттара эмсэҕэлээбэккэ, төһө да эһэни-бөрөнү көрүстэллэр, аара туох да быһылааҥҥа түбэспэккэ, дьон үтүөтүгэр, далбарыгар түбэһэн, бэркэ табыллан сырыттылар. Чахчы, үөһэттэн Айыылара көрө-истэ, көмөлөһө сылдьыбыт курдуктар.

— Мин эдэр эрдэхпиттэн атынан экстремальнай айаннары сөбүлүүбүн, бэтэринээр дьыалатыгар быһаарсабын, билигин боккуоп оҥорорго, блогердыырга үөрэнним, умна сыспыт нууччам тылын сөргүттүм. Дэриэбинэттэн ханна да ырааппатах киһи, элбэх интэриэһинэй дьону көрсөн, саҥа доҕоттордонон, уһун айаммыт сыалын сиппититтэн дьоллоохпун. Бу өссө саҕалааһын эрэ, инникитин өссө да үгүс үтүө түгэннэр күүтэллэр дии саныыбын, — диэн Арамаан санаатын үллэстэр.