Аттаах Тумул — ааттаах тумул

Сунтаар — Дьокуускай хайысханан айаннаан истэххинэ, Элгээҥҥэ тиийбэккэ уҥа өттүгэр, Аттаах Тумул — ытык аартык айанньыттары көрсөр уонна атаарар.

Бу сиргэ элгээннэр, күндэйэлэр, чакырдар, көрдүгэннэр уолаттарын уоттаах сэриигэ атаарбыттара. Онтон бэттэх бэлиэ сири өтөхсүппэккэ Иван Федорович Васильев бииргэ төрөөбүттэринээн, атастарынаан көҕүлээн биэс сыл буола-буола манна ытык өйдөбүнньүктэр үксүүллэр.

Бу үтүө үгэс Кыайыы 50 сылыттан саҕыллан быйыл 80 сылы бэлиэтээһиҥҥэ «Кыайыы 80 сылынан» диэн үтүө өйдөбүл бэлиэ арылынна. Көлүөнэлэр көрсүһүүлэригэр ыраахтан-чугастан ыалдьыт элбэҕэ, халлаан күнүнэн туран биэрбитэ, дьон өрө көтөҕүллэ сылдьара олус үчүгэй. Эһиги манна кэллэххитинэ сэргэлээх, көмүлүөктээх балаҕан үрдүнэн сэттэ туруйа көтөн иһэрин көрүөххүт, онтон Ильмень күөлүгэр, уоттаах сэрии толоонугар охтубут, сураҕа суох сүппүттэр ааттарын, мэтириэттэрин, чугастыы сытар сирдэр номоххо киирбит дьоннорун ааттарын үйэтитэр өйдөбүнньүктэри көрүөххүт, элбэҕи билиэххит.

Биэс сыл буола-буола бу көрсүһүүгэ ытык мааны кырдьаҕастарбыт төһө да тайахтанналлар кэлэллэрэ, куораттан анаан Көрдүгэн кэлэн көҕүлү өрө тутара, ааттаах оһуокайдьыттар ааттаан түһүлгэни киэргэтэллэрэ күүтүүлээх ыһыах кэриэтэ. Кырдьаҕастар бу күн ыччаттарга аны Кыайыы 100 сылыгар — 20 сылынан манна сэргэ туруораарыҥ диэн кэс тылларын эттилэр.

Бу сыллар усталарыгар хас биирдии үлэлэспит дьоҥҥо «Аттаах Тумул» диэн кыһыл, үрүҥ көмүһүнэн оонньуур түөскэ кэтэр мэтээллэри кэтэрдэн сүргэни көтөхтүлэр. Ону таһынан быйылгы тэрээһин суолтатын Үрүҥ Элгээн түбэтин ыччаттара Дойду дьоруойа Филипп Евсеев, «Хорсунун иһин мэтээл» хаһаайыттара Алексей Игнатьев, Андреян Макаров кыттыыны ылан Дойдубут, Саха сирин, Сунтаар былааҕын өрө көтөхтүлэр.

Аттаах Тумул — ааттаах тумул!

Тускулаана ГОРОХОВА-КОБЕЛЬЯНОВА