Атын эрэгийиэҥҥэ көһүөххүн баҕардаххына

Олорор сирдэрин уларытыахтарын баҕарар дьоҥҥо Госөҥөлөргө “Жизненная ситуация” диэн сервис аһылынна диэн РФ бырабыыталыстыбатын аппараатын салайааччыта – вице-премьерэ Дмитрий Григоренко иһитиннэрдэ. Ол туһунан «Российская газета» саайт суруйар.

Сервис көмөтүнэн олорор сиргэр регистрацияланыаххын, ОМС полиһын, биэнсийэҕин, социальнай төлөбүрдэргин уларыттарыаххын, поликлиникаҕа сыһыарыныаххын, оҕолоргун оскуолаҕа эбэтэр уһуйааҥҥа суруттарыаххын сөп.

Маны таһынан сервискэ араас туһалаах информация: доруобуйаларынан хааччахтаах дьон саҥа сиргэ хайдах тиийэллэрэ, ханнык тырааныспар хампаанньатынан таһаҕаскын ыытыаххын сөбө, дьиэ кыылларын хайдах тугунан тиэрдэр ордуга, массыынанан көһөргө туох докумуоннар наадалара, үлэ көрдөөһүнэ барыта баар.