Атын киһи каартатынан араас табаары атыыласпыт эр киһи тутулунна

ИДьМ сулууспатын «Дьокуускайдааҕы» 4 №-дээх полициятын отделын дьуһуурунай чааһыгар эр киһи сүтэрбит баан каартатыттан харчыта уоруллубутун туһунан сайабылыанньа суруйбут.

Холуобунай ирдэбил үлэһиттэрэ ыыппыт көрдүүр дьаһалларын түмүгэр Нерюнгри улууһуттан төрүттээх 44 саастаах киһи буолара быһаарыллыбыт. Силиэстийэҕэ быһаарыллыбытын курдук, уорбаланааччы эмсэҕэлээччи сүтэрбит баан каартатын уулуссаҕа булан, араас табаары атыылаһан барбыт. Сайабылыанньыт счетуттан харчы сүппүтүн билэн, полицияҕa тыллаабыт. Ол эрээри, ол кэмҥэ диэри буруйу оҥорооччу 3600 солкуобайы  ороскуоттаабыт.

Арассыыйа Федерациятын Холуобунай кодексатын 158-с ыстатыйатын 3-с чааһынан («Уоруу») холуобунай дьыала тэрилиннэ. Бу ыстатыйанан буруйдаах алта сылга диэри көҥүлэ быһыллыан сөп. Бу туһунан «Дьокуускайдааҕы» ИДьМ пресс-сулууспата иһитиннэрэр.